蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年10月18日

隔牆有耳:亂用控訴英黑警名句「You’ll never walk alone」
5,000利迷鬧爆譚耀宗 - 李八方

前日相信係香港利物浦球迷最黑暗一日。前日利物浦球迷見到佢哋原本係抗議英國黑警老屈嘅球會名句「You'll never walk alone」,竟然俾民建聯譚耀宗用嚟撐香港黑警,真係慘過上屆拎唔到英超冠軍,有乜理由唔嬲!所以5,000名利迷聯署今日喺報章刊登廣告,鬧爆譚耀宗!

着波衫到金鐘撐場

「You'll never walk alone」成為利物浦球迷精神指導,源於1989年英國發生希斯堡球場人踩人慘劇,導致96名利物浦球迷死亡,但英國警方事後刻意隱瞞真相,將責任推晒畀利物浦球迷,當時利物浦球隊同球迷好憤怒,將「You'll never walk alone」加入會徽上,自勉同安慰96名球迷嘅家屬。事件要直到2012年先真相大白,英國首相卡梅倫更為此道歉。
呢句「You'll never walk alone」,包含利迷對英國警察執法不公嘅控訴,譚耀宗竟然用嚟撐香港黑警,利迷梗係火滾!今次籌款發起人、球迷「利物橙」話,其實唔同嘅香港利物浦球迷會,過去唔多唔少有磨擦,但今次因為譚耀宗而大團結,誓要捍衞愛隊聲譽。噚晚仲有班利迷着晒球衣去金鐘撐場,鬧爆譚耀宗。
八方噚日問譚耀宗,知唔知「You'll never walk alone」撐警侮辱咗利物浦球迷,佢先死撐知呢句話嘅出處,話係利物浦成立以來就有,不過佢明顯唔知希斯堡球場慘劇,仲話:「句說話幾好吖,借嚟用啫!」果然禮義廉。

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載