蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年10月14日
馬上成為壹會員

隔牆有耳:黨慶籌款晚宴延期
白鴿戰狼大過天 - 李八方

狼英堅持唔肯落台,市民食嘢都冇胃口,何況擺酒?就連白鴿黨原定10月24日嘅黨慶籌款晚宴,都因為局勢不適宜,決定押後至明年3月再開席。籌少一陣錢,白鴿黨唔會死;但打少一陣狼,市民就真係㷫到發狂,白鴿黨當然因應時勢,以民意行先。主席卿姐都話呀,𠵱家最重要係爭取真普選、力促狼英下台,黨慶嗰啲嘢,遲啲先至講!
八方聽聞,白鴿黨係喺上周四嘅中委會,以現有政治形勢同氣氛都唔適合為由,一致決定將原定本月24日周五喺The One一間酒家筵開50席嘅籌款晚會押後,直至明年3月5日先至再「去飲」。據知白鴿黨呢兩日陸續以口頭以及信件,通知一早買枱支持白鴿黨嘅善心人,話無奈要延後舉行晚會,希望多多包涵。

唐唐應承捐靚酒拍賣

據聞今年白鴿黨慶,唐唐亦再次應承捐出靚酒拍賣,亦有畫家、當然唔係黃永玉啦,畫到人又到,身體力行支持一番,相信押後時間,應該冇損佢哋賀鴿嘅心意嘅。
負責白鴿黨籌款事宜嘅李華明證實,已經將黨慶押後至明年3月5日、即係農曆正月15日同大家再聚,佢認同𠵱家搞緊佔領運動,唔啱歌舞昇平開party。佢話已經同酒樓講咗延期,酒樓好好冇話要額外收費賠償。舊年晚會籌到235萬,如果今年押後,白鴿黨會唔會缺水?肥仔明豪言壯語話,當前困局下,唔爭在嗰幾百萬!

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載