蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年10月10日

隔牆有耳:
4點鐘許Sir特約 變收視保證 - 李八方

首先,八方好多謝大家嘅提問,點解呢排下晝4點鐘,電視機前總有人圍住起哄?正如八方之前所講,唔係三色台提升咗節目質素,或者八方要重申,呢個咁富娛樂性嘅節目,係由包括警察公共關係科總警司許鎮德等阿sir為觀眾送上嘅節目;八方再次重申,唔捧4點鐘許sir場,係會嚴重影響生活,英語能力都會被堵塞,呼籲合法睇電視嘅市民,盡快移除阻住電視機嘅障礙物,每日下晝4點鐘,記得準時捧場。

fb粉絲破1.6萬人

重複嘅重申,港式嘅英文,日日4點鐘,許鎮德陪住大家放學ICU,成功佔領網民歡心,名為「四點鐘許sir」嘅facebook專頁火速誕生,「報告」許sir每日對於佔領運動嘅最新回應,截至噚晚已經有過1.6萬個likes。Pat Fong will now recap in English,"Hui Sir is occupying us"。有網民甚至將卡通片歌曲《愛心一百次》改為《或者我再重申一次》,成為許sir主題曲,「像播音 無限的重申 英文稱霸像信心 使我極動人異常吸引」。嘩,真係越唱越起勁!
其實同許sir一齊見記者嘅消防處副消防總長(總部)梁偉雄,以及警務處交通總部高級警司李國忠,都有粉絲幫佢哋整facebook專頁。前者經常講解救護召達率、力指佔中阻路,所以fb專頁名為「梁sir陪你談數據」;後者通常報告交通情況,所以叫「李sir馬路的事」,真係好貼切!不過佢哋嘅likes只得幾千個,拍馬追唔上許sir咯。

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載