› 選擇地區
三藩市
紐約
洛杉磯
其他美國地區
香港 台灣 北美
 
2014年10月09日

佔領者有話說

Lincoln(廚師)

首要撤回人大方案

Lincoln(廚師)
「9.28之後,我就一直住喺力寶中心天橋底,我已經辭咗廚師份工,同一班朋友守喺前線。我覺得對話嘅首要目標一定係撤回人大方案,我哋要民主發展,如果政府堅持人大方案根本就等於冇得傾。如果繼續走17年來走過嘅路無意思,民主、公義同自由先係香港引以為傲嘅地方。
希望政府喺同學聯對話裏面,交代埋警方處理佔領嘅手法。我完全想像唔到警黑可以合作,希望有合理解釋平息民憤。對付手無寸鐵嘅市民,係咪需要用到催淚彈?下次對付暴徒,係咪要出動埋坦克車?
有屋企邊個唔想返?如果想佔領人士撤離,政府應該切實回應,畀番個我哋要嘅香港我哋。」

相關新聞:陳日君籲撤離免政府拖延

公民提名係我底線

梁小姐(文職)
「旺角上星期五爆發暴力衝突後,我先第一次上街支持佔領行動。雖然我唔會走到最前線,但個人坐喺度,新聞圖片影出嚟原來仲有咁多人支持,都係一種幫助。
學聯同政府對話,我希望政務司司長林鄭月娥能夠做個有良心嘅中間人,將香港人爭取真普選嘅訴求轉達中央,我要公民提名!連日嚟政府不斷迴避市民嘅聲音,遮掩背後強硬嘅態度,所以我對談判成果不感樂觀。
我認為公民提名係底線,如果傾唔成,學聯應該拒絕。如果冇公民提名,我直情覺得唔係一個選舉,你投嘅票,唔係投畀你希望想見到嘅人,或者唔係真心想投畀嗰個人,我覺得只係一個選擇,唔係選舉。」

冇真普選點解要?

梁同學(香港鄧鏡波中學中六生)
「政改三人組承諾過會聽民意,佢哋喺政改諮詢中提出『有票,真係唔要?』我會答:『冇真普選,點解要?』提委會組成如果沿用選委會組成方法,即使一人一票同等於冇得揀。希望喺談判中,當局可重啟政改五部曲,等到真正民意能如實反映,令中央讓步。」

相關新聞:不論談判結果 市民決緊抱學生

有誠意就要時間表

阿冰(中大心理學系碩士生)
「我想香港啲官真真正正做個中間人,佢哋冇做過橋樑工作,根本搵個背脊對住你,面向中央,完全聽指令,唔理香港人。如果政治係妥協嘅藝術,但我有我講,你有你做,冇妥協過。我想要公民提名,你話唔符合《基本法》。呢個係法律問題,但法律可以改,例都可以修。如果你有誠意,就要有時間表,話畀我知幾時有真普選,有公民提名,呢個係社會發展進程。」

無論點都支持學生

劉小姐(家庭主婦)
「學聯同政府會面,無論係咪有成果,行動係咪升級,我都會支持學生。我唔認為政改三人組有話事權,但我希望政府可以同學生坦誠對話,聆聽學生訴求。」

港人已經冇嘢可輸

DAWN(舞台設計師)
「學生同香港人已經冇嘢可以輸,學聯星期五同政府會面係好事,談判結果只要唔再向後倒退就可以。政府𠵱家好明顯採取拖延策略,我哋只可以見步行步。」

公民提名仲有機會

阿樹(飲食業)
「𠵱家進展落去係有需要談判,第一要有公民提名普選特首,同埋廢除功能組別,仲有實行單議席單票制,呢三點好重要。雖然公民提名機會不大,但仲有機會,要畀中央知道,有公民提名後,市民都可能會支持中央人選,況且𠵱家有咁多新移民,五五波咁去公平選特首。如果談判結果做到其中一、兩點,已經係好大嘅成功。如果一項都達成唔到,我會繼續堅持留守落去。」

政府企硬繼續佔領

黃同學(皇仁書院中六生)
「政改三人組出賣香港人,喺過去嘅諮詢階段,未有將港人真普選嘅要求如實反映,完全缺乏誠意去為香港帶來真正嘅民主政制。談判唔代表我哋要讓步,我哋必須堅守特首提名低門檻,冇篩選嘅底線。好多嘢喺佔領行動前,人大都講話唔得。政府如果要企硬,我會繼續佔領。」

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載