› 選擇地區
三藩市
紐約
洛杉磯
其他美國地區
香港 台灣 北美
 
2014年10月04日

隔牆有耳:又要威又要戴頭盔
建制派遙遠聲討佔中 - 李八方

噚日建制派同愛字頭大反撲,動員社團中人用暴力對付佔中人士;而28個建制派嘅議員,噚日一字排開,全部戴晒撐警嘅藍絲帶開記招,話要聲討佔中人士,不過佢哋冇喺金鐘、旺角、尖沙嘴、甚至銅鑼灣開記招,反而戴晒頭盔,走去冇雷公咁遠嘅觀塘開!

亡國興嗌到爆青筋

話說28個建制派嘅議員,去到觀塘工業區內某間酒店,開記招話要「理性對話,尋求出路」,負責牽頭嘅民建聯譚耀宗,就梗係唔認戴頭盔,遠離佔中區開記招。
譚耀宗話,本來佢哋就打算喺番立法會度開記招嘅,不過立法會𠵱家外邊周圍都係人,甚至乎有市民喺度瞓覺㖭,既然佢哋都返唔到立法會,咪拜託旅遊界議員姚思榮搵一個場,俾建制派一齊出嚟見傳媒囉!
不過八方覺得建制派揀觀塘呢個地方,真係好有戰略考慮,因為觀塘一向係左派地頭,真係唔使怕有佔中人士踩場,戴咁大頂頭盔,真係講句嘢都特別有氣勢。
好似工聯會亡國興連青筋都現晒,不斷大聲咆哮話佔領人士影響打工仔生計、好唔公道、好唔公義呀!真係八方都嚇到要行遠少少!
講開又講,前日政務司司長林鄭月娥同立法會八大板塊政黨開會,原來冇預工聯會同新民黨,亡國興噚日同八方確認唔知有呢場密會,佢亦好大方咁話唔介意。但冇份開會嘅新民黨,唔知係咪介意冇份,所以葉劉噚日自告奮勇,話願意出嚟參與各方會談,你睇建制派幾團結呢!

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載