› 選擇地區
三藩市
紐約
洛杉磯
其他美國地區
香港 台灣 北美
 
2014年10月03日

隔牆有耳:催淚彈煙霧中
肥佬黎背影登TIME封面 - 李八方

身為茄喱啡卻鍊贏主角,肥佬黎唔知會唔會覺得好錯愕?話說《時代雜誌》亞洲版最新一期封面,以"The Umbrella Revolution(雨傘革命)"為題報道和平佔中運動,相中主角係9月28日警方施放催淚彈期間,撐傘企喺催淚彈煙霧間嘅男子,但撐傘男身後只見背影嘅男子,卻更加吸引港人焦點,事關其中一個人,就係壹傳媒老闆黎智英!

疑似由兩張相合成

雨傘革命成為國際傳媒關注議題,外媒顯著報道當然唔出奇,但最新一期《時代雜誌》亞洲版封面,卻令唔少花生友感覺有啲事有蹺蹊!據知封面大相原來係由兩張相合成,除咗撐傘男主角,仲專登搵咗張有一個着住白色衫襯藍色牛仔褲嘅男子相襯底;相片可見企喺遠處嘅白衣男俾人攙扶住,有啲痛苦咁彎住腰。
唔少人睇多兩眼,從衣飾裝扮發現呢位男士係9.28連中兩彈嘅肥佬黎,當日肥佬黎受到催淚彈攻擊,嗆住彎腰當街流淚兼流鼻涕;估唔到佢呢個背影嘅感染力深獲雜誌「賞識」,以大配角身份化身封面人物!事有湊巧嘅係,肥佬黎不嬲瞓身力撐運動、兼且成日俾人話佢同外國勢力有關,唔知呢張「意外」封面照,會唔會又令佢惹嚟新一輪狙擊?

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載