› 選擇地區
三藩市
紐約
洛杉磯
其他美國地區
香港 台灣 北美
 
2014年09月29日

隔牆有耳:暴力清場 美國華人睇唔過眼
通緝人道罪犯狼振英 - 李八方

眼見學生願意自我犧牲為港人換真普選,身為特首嘅狼英卻連日龜縮,由周五晚學生開始留守政總後,一直唔肯現身同學生對話,直至噚日先死死地氣出嚟見記者;連身在美國嘅華人都睇唔過眼,大舉「通緝」狼英呢位反人道罪犯。估唔到狼英嘅臭名遠播至美國!原來事事內地化嘅佢,施政咁鬼國際化囉!

黑衣上街為學生打氣

話說喺港人自發去政總聲援學生之際,就連喺美國嘅華人,香港移民同民運人士亦睇唔過眼,攞住寫有「全球聲援香港真普選」橫額,着黑衣上街越洋為學生打氣。睇住一個個"Save Hong Kong"、"Universal Suffrage in Hong Kong"同「香港挺住」嘅標語,證明學生幾咁感動人心!
其實學生罷課,源於狼英懶理普選民意,根本就係事件罪魁禍首,所以呢班在美華人亦出通緝令,"Most Wanted"呢位禍港之首。到底佢犯咗乜事呢?其實真係多到數唔晒,但喺呢件暴力清場事件明顯違反人道,佢肯定係「反人道罪犯(criminal against humanity)」。
而喺政總、即係狼英嘅主場,外牆亦有寫住「通緝梁振英」嘅標語同佢俾人打咗交叉嘅樣;旁邊仲有一張有佢個樣兼且寫住「屎忽鬼」嘅貼紙,估唔到佢連自己地頭都冇碇企!
查實唔少政界中人都睇唔過眼佢拒見罷課學生之時,卻出席百仁基金安排嘅閉門活動。
當時有學生就佢擺佈囡囡同僭建問題挑機,點知狼英好鬼厚面皮,竟然話:「至於僭健,最重要嘅係,如證實係僭建就要立即拆」。有政界中人大鬧佢玩語言偽術,係咪拆咗等於冇違法先?睇見佢咁嘅所謂「邏輯」,就知狼班子點解等住執笠!身在日本嘅市民更加喺facebook成立「在日港人政改關注組」,同聲聲討梁班子惡行。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載