› 選擇地區
三藩市
紐約
洛杉磯
其他美國地區
香港 台灣 北美
 
2014年09月09日

將為三子剃頭
髮型師:我想有選擇

【記者馬志剛報道】佔中三子今日剃頭明志,操刀者不是星級金鉸剪,而是戴耀廷平常「御用」街坊髮型師阿Tom。生於斯長於斯,眼看民生二三事,感覺港人近年驟變二等公民,講廣東話也幾近遭歧視,生活空間不斷受擠壓,即使佔中難有即時效果,阿Tom也表明支持,冀能產生微妙化學作用,讓社會走向正途,「我唔想獨裁,唔想硬食;我想有真正選擇,唔係由你話我知得A、B、C餐可以揀」。

相關新聞:熱線一出即被「佔領」

「呢步棋輸硬都要攻一攻」

39歲的阿Tom是髮型屋三位合夥人之一,為戴耀廷剪髮已有約七、八年。起初只知戴是大學教授,去年在電視新聞中看見戴,才驚覺他就是佔中推手。自此戴耀廷來剪髮,兩人傾談話題也由閒話家常湊仔經,變成佔領中環爭普選,「以前真係好少接觸政治,但人大咗,慢慢會關心社會變化,加上生咗小朋友,更關心香港未來會係點」。
髮型屋對面,是一幅巨型「豪宅牆」,當中不少住客是內地學生,「有客人話,喺𨋢講廣東話都好似被人歧視咁……以前嘅香港,好似已經冇咗」。Tom慨嘆,昔日香港的青年人想法較長遠,會考慮將來,但近年的青年人,目光較短暫,「因為佢哋睇唔到自己仲有乜嘢出路」。他認同戴的說法,是制度出了問題,加上議會代表性不足,造就意見兩極化,港人前路更迷茫。
月初人大一錘定音,普選有篩選幾近成定局,「好失望,又話港人治港。可能個樣係香港人,但已被洗腦,同化咗妝走嚟管治,有乜分別?」他拒絕硬食,表明撐佔中,「硬食就會變得順理成章,錯嘅變成啱,改變唔到佢(當權者)想法。呢步棋即使輸硬,都要攻一攻」。
近日Tom與客人攀談,也會做個小民調,探聽各人的取態,「有人其實想改變,但又唔想出聲;有人乜都唔識,但都願意親身出去行動。當然有人反對搞咁多嘢,只睇經濟情況,但我覺得咁樣有啲短視,長遠應該行多步」。
Tom表明願意親身參與佔中。不怕秋後算賬?「我所做嘅只係好少,冇嘢好驚」。有指佔中犯法、影響經濟,「咁呢個行為先有力,冇power冇意思,冇人會理你。佔中可以令大家睇清楚成件事,會產生一啲化學作用,結果係點已經唔重要。我相信佔中係香港由唔好演變到好嘅轉捩點,起碼俾對方反思,做嘅嘢要服眾」。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載