› 選擇地區
三藩市
紐約
洛杉磯
其他美國地區
香港 台灣 北美
 
2014年08月26日

隔牆有耳:《大食會》潮文 寸爆政改呃人 
劣食幾味 點啃住先? - 李八方

政府喺人大落閘前,唔理方案係乜,不斷叫人袋住先,仲專登整咗條宣傳片,以「有票,真係唔要?」為口號,幫市民洗腦。但係咪有得袋,就唔理三七廿一,乜都要夾硬袋住先呢?有網民就喺高登討論區以「學校大食會」為題,寫成一篇潮文,話校長聲稱搞大食會,會有美食薈萃,但查實只係即食麵等junk food,諷刺同政改一樣呃人,食住先嘅下場,即係冇得揀呀!

網民建議佔領操場

呢篇潮文點解令人「頓開茅塞」?從睇過嘅人會發出會心微笑,就知篇文幾有料!作者話,佢學校嘅校長要搞大食會,好籠統咁列出「本土風情」等食物名,聲稱會畀同學有選擇,但最終呢?只係食公仔麵、紅豆壽司等唔健康或唔討好嘅嘢食,而校長諮詢期間,原來只諮詢過「擦鞋仔」,換言之係假諮詢。當作者say no,校長就話佢唔理性,質疑係咪只要有得食,難食都要硬啃先?
呢篇文,表面寫學校大食會,實際明顯講緊政改大龍鳳,難怪篇文喺網絡熱爆,唔少人睇完都滴汗,好驚如果真係袋住先,一如作者咁,唔會有貨真價實嘅好嘢食,最終出閘畀市民揀嘅,咪都係狼英一號、二號同三號,如果係咁,點啃得落?
網民睇完呢篇曲到直諷刺袋住先嘅潮文,紛紛話個校長可能姓梁、擦鞋仔姓張……呀,應該係姓周至啱,學校或叫「香港特別行政區紀念中學」。另有網民建議作者搞罷食或佔領操場、教員室等抗爭;當然亦有人覺得,紅豆壽司算係咁,粗粗哋食住先。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載