› 選擇地區
三藩市
紐約
洛杉磯
其他美國地區
香港 台灣 北美
 
2014年08月21日

隔牆有耳:接受魔童挑機
卡片蘇破冰 Chok住變河童 - 李八方

香港全民皆冰!由蛋撻頭chok look,變咗濕身河童,商務及經濟發展局局長蘇錦樑都玩淋冰,噚日搵埋副局長梁敬國、政治助理陳百里、前海洋公園主席盛智文以及投資推廣署署長賈沛年等,趕上近期熱爆全球嘅冰桶挑戰(Ice Bucket Challenge),幾個散冰游勇趁午飯時間喺添馬公園淋冰,話要同港視主席王維基冰釋前嫌喎!

相關新聞:隔牆有耳:偲嫣BB騎呢抽水

魔童日前先禮後冰,淋冰後話卡片蘇對佢「恩重如山」,仲挑蘇錦樑機,叫佢接力。平時官仔骨骨一副chok look嘅卡片蘇,並無曳冰棄甲,噚日換上便服迎戰,攞住冰桶現身時厲冰秣馬,即席出手「破冰」!
一聲令下,五人短冰相接,只見卡片蘇嘅蛋撻頭頓變河童裝,話感覺「唔係太凍」,但就令佢頭腦冷靜;八方希望佢知道民怨冰封三尺,處理港視申請牌照時聽民意,否則再有十幾萬人上街,隨時陪了夫人又折冰。按規矩,佢要向三個人挑機,黎明、旅發局主席林建岳同「愛基金」主席蔣麗萍榜上有名,佢亦捐款100美元畀美國ALSA,同時向香港肌腱協會同愛基金分別捐5,000蚊港元。

狼英按冰不動

至於獲志雲大師挑機嘅政制局局長譚志源,拒絕「冰來將擋」,透過發言人話因為「俗務纏身」,難以玩淋冰。有厚多士笑笑口話,唔通局長唔知可以戴帽,好驚凍親個頭?雖然譚志源鳴金收冰,佢都自動獻身,話會捐款畀香港肌腱協會,更膽大包天,越級叫特首狼英接招淋冰,佢嘅前波士梁錦松同前政府拍檔梁卓偉都有份。狼英則按冰不動,透過特首辦發言人紙上談冰,話以捐款方式支持,將向美國ALSA捐100美元,另向香港肌腱協會捐一萬蚊港幣;食衞局局長高永文都話只會捐錢唔會淋冰。環境局局長黃錦星今日都會拍住政助區詠芷喺添馬公園淋冰嚮應。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載