› 選擇地區
三藩市
紐約
洛杉磯
其他美國地區
香港 台灣 北美
 
2014年08月16日

隔牆有耳:雞毛當令箭 冇邀請遊行
白頭佬唔畀面 8.17建制大佬no show - 李八方

土共大串連8.17遊行大龍鳳明天上演,張融聲稱有廿萬人上街,萬人空巷不在話下,不過有人同八方講,簽咗名當向西環交咗差,懶得去做張融佈景板;亦有人話大聯盟公關、「白頭佬」程介南好似「揸住雞毛當令箭」,對班大佬級人馬懶懶閒,以為人哋會自動送上門去遊行,班大佬條氣又點會順?和諧騷幕後,充滿深層次矛盾。

唔做張融佈景板

據聞今次大遊行由「白頭佬」程介南做公關,負責聯絡各路人馬,但有唔少有份簽反佔中聯署嘅大佬級人馬就話,冇人聯絡佢哋班大佬去遊行,有人同八方講,須知道呢班大佬入面,商會阿頭又有、議員、業界代表又有,冇理由冇被邀請啩,唔係行龍頭,起碼都有得上台曝光,點知等嚟等去都冇接到通知,仲有人收到訊息,話叫班大佬級人馬「自動獻身」去遊行,咁佢哋就更加頂住條氣!有人索性叫馬仔帶隊去反佔中遊行就算,自己就唔現身,「做乜要理呢班揸住雞毛當令箭嘅友?唔好留喺屋企嘆冷氣!」
至於另一類唔去佔中遊行嘅大佬,就擺明唔做張融佈景板。有某政界大佬級人物稱,今次張融拎住北京個名,抽盡建制派水,「佢憑乜號令我哋?仲要我哋企佢後面,聽佢發噏風?」有人覺得簽咗名就可以向西環交差,「冇人叫我哋8.17非去不可,我點都唔畀張融再抽水」。
至於有幾多大佬級人馬8.17會no show?有人笑言梗係唔會預早講,「容乜易收西環電話,夾我哋去㗎」。但八方知道,自由黨叫黨員去8.17遊行嘅通知,名單入面就冇黨魁田北俊個名嘞!

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載