› 選擇地區
三藩市
紐約
洛杉磯
其他美國地區
香港 台灣 北美
 
2014年08月13日

官員不肯開會商討安置

東北發展的前期工程將在長者村旁開展,勢將滋擾村內逾千長者。

【本報訊】在古洞村內,有老字號醬油廠、木廠等工業映照香港百年變遷,也有農田供應全港撐起僅有的「本地菜」,更有一條收納了千名長者的「長者村」,讓他們安享晚年。不過,一眾安老院經營者就批評,政府在古洞的前期工程範圍正正在長者村旁邊,但官員至今仍不肯應邀召開跨部門會議講解工程和商討安置,批評政府毫無誠意,「講得出,但未做到就開工,邊係開明政府嘅作為?」
在古洞村粉嶺公路旁的石仔嶺花園,曾是英軍軍營,後來政府招標出租,因環境優美,吸引不少安老院經營者進駐,演變成一條低密度長者村,至今有17年歷史。
石仔嶺安老服務聯會副主席陳淑馨指,當初長者村只是一個廢棄軍營,能有今天環境是各院舍共同努力成果,「當初大家都係捱義氣入嚟做,但𠵱家調返轉話要發展就趕走我哋」。她說不少長者得知立法會財委會通過前期工程撥款後,都擔心未來去向,「佢哋不斷問,係咪要拆,係咪要走喇,第時會點㗎?但我哋全部都答唔出」。
陳淑馨指,自5月14日與政府部門開會後,曾多番去信及致電要求政府再召開跨部門會議,交代前期工程內容會如何影響長者生活,以及有沒有新方案安置長者,「但完全杳無音訊,好似斷咗氣咁冇人畀過回應」。她指各經營者希望得悉前期工程的勘探、土地平整等會如何進行,「但我哋𠵱家乜都唔知,點同老人家交代?」
聯會總幹事蔣月蘭指,上次與政府會面時,對方拋出一個聲稱兼顧長者的原區安置計劃,在現址附近興建一座大樓及分兩階段清拆院舍,「講完就冇聲氣,係咪可行都唔知,我哋唔會就咁袋住先,因為根本冇嘢畀我哋袋」。她強調長者希望維持現有生活,但依政府做法會出現更多滋擾,「一路拆樓一路叫佢哋繼續住,咁拆咗受影響嗰班長者住邊先?半天吊呀?」

相關新聞:財哥爬天橋驚無民主

工程滋擾村內逾千長者

陳淑馨不認為政府有誠意解決問題,「有誠意會連開一次會都唔得?我哋真係唔知佢哋搞乜。」她坦言,前期工程必然對安老院有直接影響,因為工程範圍就在石仔嶺花園旁,「到時沙塵飛揚、噪音好大,點叫長者安樂呢?」
陳又說,作為安老院經營者,能作出的抗爭行動有限,「我哋當然想不遷不拆,但唔可能叫長者同我哋一齊抗爭」。她說既然政府收地發展會影響千多長者,理應先安置後清拆。她又斥政府阻長者選擇石仔嶺,「有啲長者親友話我哋聽,政府職員會同佢哋講,揀石仔嶺要諗清楚喎,就拆㗎喎。咁大個政府點解要做呢啲小動作呢?」

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載