› 選擇地區
三藩市
紐約
洛杉磯
其他美國地區
香港 台灣 北美
 
2014年08月12日

隔牆有耳:紀念誕辰110周年 播片歌功頌德
鄧小平展抹走屠城真相 - 李八方

今年係鄧小平誕辰110周年,阿爺按慣例要大搞一番。噚日展覽組委會舉行記者會,宣佈下禮拜四至六喺會展舉行大型展覽,免費入場。展覽當然係為小平同志歌功頌德,至於提唔提89年鄧老下令嘅六四屠城,大會竟然賣關子,話「相信裏面有部份內容」觸及六四,但係乜資料就叫大家去睇吓。八方預料血淋淋嘅屠城史實,只會被搞手丟棄抹走;塗脂抹粉嘅嘢,就肯定大把。

拍板叫軍隊殺學生

中共中央文獻研究室副秘書長高屹噚日宣佈展覽詳情,除咗有400幾張珍貴圖片,仲有鄧小平用過嘅輪椅、佢嘅手迹、銅像,仲有講述鄧小平同香港嘅《小平與香港》專題影片,同時請咗鄧小平嘅親屬到場。
但對於港人嚟講,鄧小平除咗帶領中國改革開放,最為港人熟悉嘅,一定係佢拍板叫軍隊入城用坦克車、機關槍,殺死手無寸鐵嘅學生。咁展覽係咪會涵蓋八九六四?高屹先呆咗三秒,話「這個……你看了展覽就會知道」,之後被一再追問,佢先話「我相信裏面會有部份內容」。佢死都唔講係乜資料,淨係叫大家去睇展覽。
六四紀念館館長林漢堅則相信,所謂嘅「部份內容」,都係正面兼輕描淡寫,如果夠薑、忠於史實,展覽應該披露當年鄧小平點樣下令屠城、喺黨內點樣評價六四,但相信呢啲第一手資料,應該見唔到光。

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載