› 選擇地區
三藩市
紐約
洛杉磯
其他美國地區
香港 台灣 北美
 
2014年08月09日

建制派搶嘢播毒 監粗撥款 瘋語傷人
隔牆有耳:立會嘩鬼七不思議事件(二) - 李八方

亡國興晒公廁紙播菌

最鍾意「日以繼夜、夜以繼日」嘅工聯會王國興,今屆會期幾乎令立法會成為病毒溫床,當然唔係話佢嘅反拉布反佔中言論令立法會滋生「抹黑病菌」,事實上佢真係喺去年底,唔知「攞」定「偷」咗公廁嘅廁紙放喺立法會而俾主席訓斥!
事緣亡國興有日突然「攞」住五卷公廁廁紙去立法會開會,仲放喺自己個位,疑心生暗鬼咁話啲公廁廁紙灰濛濛,同政總白雪雪嗰啲好唔同,要求政府部門統一廁紙嘅質素!當大家都俾佢呢個不可思議舉動嚇一跳時,主席曾鈺成卻關注同事嘅生命安全,叮囑議員唔好帶啲受污染物入會議廳。負責答辯嘅食衞局局長高永文亦暗寸亡國興膚淺,佢話廁紙顏色同含菌量係冇關嘅,廁紙質量亦見仁見智。唔知亡國興最後點善用呢批灰色嘅公廁廁紙呢?

相關新聞:建制派搶嘢播毒 監粗撥款 瘋語傷人隔牆有耳:立會嘩鬼七不思議事件(一)

鬼話Tree根英文嚇人

雖則話港鐵成日加價,但又頻頻故障兼想隱瞞公眾好鬼抵鬧,但如果好似Tree根咁用港式英文發炮,最終變成笑料而嚴肅性近乎零,就有啲嘥gas嘞!
查實肯鼓起勇氣講英文,係值得鼓勵嘅,但Tree根嘅港式英文,加埋佢嘅語氣同態度,實在係太滑稽喇。佢5月喺鐵路事宜小組委員會上盤問當時仲係港鐵CEO嘅韋達誠時,忽然轉台用英文鬧對方"Shame! Shame on you!",繼而話對方"You are dreaming on your office, or you are not attend on your office?"當韋達誠笑住話以專業態度返工,Tree根爆seed以「I don't think so囉」回應。港人講鬼話,結果成為今屆會期議會經典金句!

鼠王芬掀妖冶新定義

講到立法會嘅「知名」女議員,九龍西嘅經民聯梁美芬一定上榜。雖則元秋蔣麗芸入咗立法會後,鼠王芬被搶去風頭,但仍然神不知鬼不覺咁,令大家印象難忘!「梁美芬志願軍」,你加入咗未?呢句唔係廣告口號,而係響應鼠王芬嘅「建議」而成立,事關佢早前喺特首答問大會上,建議警隊吸納退休警員同市民組成「志願軍」對付佔中喎,俾人批評佢想搞香港城管,網民咪組織「志願軍」為佢「打氣」囉!點知「志願軍」都未出動,唔少人已經俾鼠王芬嘅妖冶K.O.!話說因為着短褲而被投訴唔莊重嘅長毛,暗示鼠王芬衣着好妖冶,激到鼠王芬向立法會主席曾鈺成投訴;厚多士嘅范國威就話,妖冶係要有客觀條件喎!鼠王芬當堂冇聲出,相信佢都好驚訝,自己為妖冶下咗新定義!

𤓓爆盧偉國傳錯WhatsApp

由於有吳亮星珠玉在前,其他議員主持會議時縱然有乜問題,相對下只係小小瑕疵啫!其中一個「小瑕疵」,由冒失鬼經民聯盧偉國「擁有」,佢因為傳錯WhatsApp惹起小風波!
立法會工務小組今年5月討論「一堆一爐」時,新民主同盟范國威就大爆身為小組主席嘅盧偉國對「三堆一爐」有預設立場。有圖有真相!原來咖喱范喺4月時收過盧偉國發出嘅WhatsApp短訊,內容係「今早要投票三堆一爐,建制派要夠人至得!」
此說一出即時惹起當時喺公眾席嘅將軍澳居民起哄,有泛民議員話佢唔適宜再任主席。雖然佢喺建制派力保下避過下台一劫,但唔少建制派私下笑佢辳爆,因為佢呢個WhatsApp原來係想傳去建制派群組,點估到佢會離奇到傳錯去工務小組度?

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載