蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年07月29日

隔牆有耳:七月節目 跟足人哋拍
CCTVB抄鬼晒網台 - 李八方

前日農曆七月初一,又係鬼門關大開嘅時候,CCTVB趁機推出以鬼故為題材嘅節目《區區有鬼故》嚟應節,喺上星期六播出,仲搵埋「龍婆」羅蘭姐做主持,頭炮講灣仔區,點知有眼利嘅網民發現個節目熟口熟面,同網台低俗頻道嘅怪談節目《大丸有落》其中一集好似,懷疑CCTVB又抄襲。

東城戲院講拍膊頭借火

CCTVB抄嘢就唔係新聞,不過佢哋原來由過往抄電影、抄其他電視台,變到連網台都照抄。有網民話,喺3月19日播出嗰集《大丸有落》,講灣仔區著名嘅鬼故,包括東城戲院、修頓球場、灣仔舊街市、灣仔郵政局、南固臺、八公廟、星街等。CCTVB上周六出街嘅《區區有鬼故》,亦係講東城戲院、修頓球場、灣仔舊街市、南固臺同星街嘅鬼故。而且鬼故內容有九成幾相似,以東城戲院為例,兩個節目都提到睇戲時被拍膊頭借火,以及女廁見到個無面女鬼嘅鬼故。
八方翻睇呢兩集內容,發現兩者取材鬼故內容相同,但《大丸有落》可能經費有限,製作比較粗疏,相反,財雄勢大嘅CCTVB製作明顯包裝過,除有靚實景同訪問區內街坊外,並有半個鐘嘅鬼故短劇。
八方唔排除CCTVB偷換《大丸有落》嘅概念而構思《區區有鬼故》呢個節目,但鬼故來來去去都係嗰啲橋段,而且著名鬼故早已流傳幾十年,甚至過百年,以往都有唔少節目翻兜無數次,呢單抄節目羅生門,CCTVB都唔係話冇機會「打得甩」。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載