› 選擇地區
三藩市
紐約
洛杉磯
其他美國地區
香港 台灣 北美
 
2014年07月18日

隔牆有耳 :
政總圍城 蛇鼠一窩 - 李八方

圍住了的血汗,圍住了的跌宕,狼英噚日用咗重重圍板,圍住了外界對門常開的厚望。面對政總變監獄,唔少政界中人都慨嘆,點解政府要淪落成咁?好多人都話呀,狼英唔聽民意,梗係想同外界隔絕,喺密封嘅圈子炮製主流民意;相信支持佢嘅梁粉大軍,包括李偲嫣、吳亮星以及陳茂波,都覺得呢個冇異見嘅政總監獄,耳根清靜,宜室又宜居。

高登仔嘆做太多陰騭事

政總變監獄,引起高登巴打熱論,慨嘆今不如昔。有巴打憶述那些年成日去中環舊政總食平價飯,之後仲可以喺中庭棵百年大樹嘆支飯後煙兼吹吹風,𠵱家政總卻「門高狗大,幾十個食蕉,幾百度(個)鐵馬,心諗,咁驚有人隊你,就咪做咁多陰質(騭)事啦!」
雖然圍板惹起怒吼,但相信唔少梁粉都會舉腳支持,遲早會進駐。當中唔少得正義聯盟李偲嫣,記得佢早前為乜喺政總紮營絕食嗎?相信唔會係為減肥變V煞面嘅,佢話反暴力唔like衝擊嘛,仲一度拒絕《蘋果》採訪。如果再喺政總監獄紮營,肯定冇人騷擾,安安樂樂絕食減肥……噢,係反暴力至真。
財委會主席吳亮星喺粗暴強推新界東北撥款後,要喺保安組成人鏈下龜縮離開,相信佢自此都唔想再低頭做人。喺呢個政總監獄呢,一個示威者同記者都冇喎,睇怕佢可以大搖大擺抬起頭做人咯!另一位東北悍將發展局局長陳茂波相信都係咁話,由於怕亮相惹狙擊,改用網誌發佈消息。家陣一啲雜音都冇,怕且喺佢網誌下嘅撐新界東北意見,百分百係「主流」。

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載