› 選擇地區
三藩市
紐約
洛杉磯
其他美國地區
香港 台灣 北美
 
2014年07月17日

隔牆有耳:
狼英 劉華 做政改攝石人 
一個成功攞威 一個淪佈景板 - 李八方

有冇發現,日前喺政改三人組嘅記者會上,狼英不單坐正中間,仲做埋主持分發記者提問,當正自己係主角;與此同時,唔入流嘅政制及內地事務局副局長劉江華,卻竟然有份登大雅之堂同三人組坐埋一齊。點解無啦啦由三個變五個?原來狼英係主動要求出席記者會,拍住劉華雙雙做攝石人,似乎唔想俾三人組搶晒鏡。

據聞,當局一早安排,政改報告公佈同日,政改三人組會開記者會見傳媒。但政制及內地事務局局長譚志源噚日喺電台自爆,當立法會上周決定三人組前日可以出席立法會特別內會,以及決定開記招後,狼英主動向佢哋提出不如一齊見記者吖,因為佢都有報告公佈。又係嘅,唔通狼英開到口,政改三人組敢落閘咩?狼英攝入記者會,仲做埋指揮員就係後話嘞!

政府新聞網唔畀面劉華

至於非主流嘅敗選前立法會議員劉華副局長又點解有份?譚志源話係佢哋建議嘅,因為劉華出席最多團體見面,有啲仲單拖赴會,感謝佢之餘,「擺」佢喺度都係好㗎,以便佢可以應對相關問題。相信局長同八方一樣,勢估唔到所有傳媒對呢位大茄一啲興趣都冇,令佢喺記者會上儼如佈景板,一條問題都唔使答。
就連政府新聞網都似乎覺得劉華唔入流喎。有網民發現,當日網站報道政改記者會時,竟然將企喺最右嘅劉華裁走,好似得四人開記者會咁。相信劉華都只能嘆句:攝得到,都未必好!

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載