› 選擇地區
三藩市
紐約
洛杉磯
其他美國地區
香港 台灣 北美
 
2014年07月14日

梁耀忠被斥喝:議員大晒呀?

梁耀忠指被捕當日受到警方不禮貌對待。

街工立法會議員梁耀忠,61歲,從政逾30年,在7月2日預演佔中首嘗被警方拘捕、搜身、被呼喝:「議員大晒呀?」
「我第一次俾警方抬。我係嗰行最後一個,隔籬係陶君行,阿陶被抬走,得我一個喺街度……有個軍裝想屈我手,新界東北(示威)嗰次知道咁屈會好痛、好傷,我捉住佢手指,話你唔好屈我手,佢想發火、發嬲,我不斷罵:『我已經同你行緊,你仲要屈我?』佢就好無奈,終於照行唔再整我。」

相關新聞: 「唔行呢一步 隨時做奴隸」

「係咁擰同學塊面」

「我最唔開心見到警察將同學塊面係咁擰係咁擰,我哋和平示威,真係和平。」一場史無前例的大規模拘捕行動,梁耀忠看到的是警方對示威者的敵視,踐踏人權。「陶君行喺我前面,不斷大聲講:『我行緊啦,你仲鍊住我做乜』,好大聲鬧個軍裝。咁我見軍裝完全唔理佢,好離譜,人哋都行緊做乜仲鍊住人,我就話佢,你知唔知個軍裝點樣?佢凶神惡煞望返轉頭,好似想打我咁,我睩大雙眼繼續話:『你好放手喇!』你知唔知佢跟住點講?佢話:『議員大晒呀?』好惡好大聲咁講。」
511位被捕者中,15人是街工成員,他們相信面對中央、港府一浪接一浪的打壓,惟有反抗才能推動社會向前行,抗爭行動陸續有來,但呼籲大前提「要自己保護自己」。
「梁振英(7月2日後)話逐個抬係浪費警力,今次500人,下次5,000或者10,000人,你就唔逐個抬,而係用水炮、催淚彈、橡膠子彈。我就擔心呢樣嘢,第二個人我唔憂慮,但梁振英我會憂慮,因為特首選舉時唐英年講『你呃人』,就係話佢唔認講會出動解放軍,佢個心一直係咁,警務處處長曾偉雄係佢爪牙,梁振英下令,曾偉雄唔會抗命。」

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載