› 選擇地區
三藩市
紐約
洛杉磯
其他美國地區
香港 台灣 北美
 
2014年07月09日

隔牆有耳:塑膠 金屬 瓦通紙業無厘頭登廣告 
騎呢商會大軍撐警隊 - 李八方

香港聖公會大主教鄺保羅訓誨信眾話:「唔知成日出咁多聲做乜,好似唔出聲就冇機會,就啞㗎啦!」點知近排啲人硬係唔肯做羔羊,支持同反對佔中兩大陣營,都繼續怒吼。除咗好幾個紀律部隊團體之外,就連塑膠、金屬、瓦通紙業等唔關事嘅商會,都無厘頭爭住登廣告,齊齊發聲撐警隊。嘩,禿鷹有呢班「精兵」支持,警隊日後佔中清場肯定更「勇武」!

8組織聯署落廣告

噚日喺《香港商報》一個由八個工商界組織署名嘅廣告,排首位係香港出口商會,呢個會大家未必識,但應該知佢哋嘅名譽會長全國政協常委陳永棋係乜水。其餘組織包括香港模具協會、香港瓦通紙業廠商會、香港金屬製造業協會同香港塑膠業廠商會等等。
聲明話喎:「就着近日社會上的衝擊,我們熱愛的香港已被騎劫,社會充斥着謾罵和指責的聲音,市民平和的生活日漸消失。我們營商的中小企甚感痛心,為此也發出不平則鳴的呼籲,要求齊心維護香港秩序,支持警隊依法辦事,嚴懲違法違紀行為,回復議會正常運作。」
衝擊議會、佔領中環,關瓦通紙乜事?八方都唔明解㗎,但警隊要證明佢哋清場有理,梗係要動員越多人支持佢哋越好啦,大家唔見灣仔警署外,家陣幾乎日日有團體去獻菊……吖,唔係,係獻花至真。撐警隊嘅嘢,重質唔重量嘅箒,對禿鷹嚟講,應該多多益善、少少無拘!
八方估計騎呢商會撐警隊行動陸續有來,唔知幾時輪到MaBelle?點解係MaBelle?事關佢哋老闆馬墉宜,最近向利興鑽石集團全體員工發email,叫佢哋看清泛民領袖嘅偽善,仲建議員工加入親政府組織「幫港出聲」,下一步仲唔係去撐禿鷹?

李八方
http://pf_lee @appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載