› 選擇地區
三藩市
紐約
洛杉磯
其他美國地區
香港 台灣 北美
 
2014年05月12日

忽然Hi-Tech有古怪
(添馬男) - 添馬男

5月10日晚,梁振英啟程訪問瑞典,考察當地科技發展的經驗。 資料圖片

自三月兩會後,梁振英就恍如蒸發咗,香港進入無人駕駛狀態。當黃錦星、陸恭蕙為「三堆一爐」頭痛不已,上立法會工務工程委員會又被小型拉布所阻,建制派散修修,怕失選票而左搖右擺 ,梁振英正在巴黎遊玩飲宴,不亦樂乎。
另一位張炳良更頭頭碰着黑,先有審計署批評房委會建屋唔達標,跟手就南丫島海難紀律調查報告公開問題,被死難家屬指摘,跟手整劑大大鑊涉嫌串謀隱瞞高鐵嚴重延誤,被立法會特權法追殺,梁振英雖然提前返港,但對外既公開力挺張炳良,對內亦任由建制派田二少發癲。
蘇錦樑則因中港矛盾升溫受到「屎包裹」連環攻擊,至於財政預算案受拉布阻撓,曾鈺成金盆洗手,將剪布權交還立會泛民派,睇住政府逐步陷入財政懸崖,曾俊華無計可施。至於林鄭,自然受政制討論兩極化所煎熬。身為阿頭,梁振英竟然選擇保持距離,免受負面批評而失分。
梁振英採取一套「凡事唔上身」策略,近兩個月的而且確成功穩住民望,甚至有些微反彈,但代價係成個問責團隊及建制派散晒。佢放假去巴黎玩完後,又立即出發去瑞典考察,仲話研究同瑞典科技界合作空間云云。係人都知呢類政客外遊考察Show乃姿態多於實際,梁振英正為成立創新科技局造勢。當整個政府水深火熱,建制派與政府同床異夢,管治力量消散,暗戰頻頻時,梁振英一番心思卻放喺「董建華式科技大躍進夢」,實在古怪。
早前傳過梁振英已成立連任辦公室,並安插班底進入政府及法定機構,分派政治酬庸。雖然上海之行,港澳辦主任王光亞被問到中央是否支持梁振英連任問題,佢斬釘截鐵話絕無其事,中央當然唔可能咁早表態,但唔代表梁停止其連任大計。早前吹出跨越任期大嶼山開發計劃,委派財閥代表加入相關委員會,與地產財團建立共生利益關係,自然大有政治裨益。高新科技大躍進則是創造另一個利益大餅,董建華任內大白象式創新科技項目,有九龍塘創新中心、科學園擴建、數碼港,究竟對香港科技產業發展有乜幫助,想了解不妨去數碼港行一圈,死氣沉沉,張震遠商交所便租用數碼港寫字樓,唔知同高新科技有何關係?典型大白象工程!
梁連任工程第二大項目創新科技,要過立法會財委會一關,今次申請開位建議十分騎呢,強行將相關嘅通訊及知識產權部份留在原有蘇錦樑部門,令人手資源無端增加,政策又架床叠屋,科技局部門工作範圍好細,是為梁振英落實某些科技項目而設,從政策分工角度而言,有關建議對推動香港科技產業政策發展冇乜大幫助。
議員如果睇得通,應該知道點做,分拆科技局,其實係為乜 !

添馬男

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載