› 選擇地區
三藩市
紐約
洛杉磯
其他美國地區
香港 台灣 北美
 
2014年05月03日

來港經營16年 不敵貴租高薪
FAT ANGELO’S全線結業

【本報訊】在港經營16年、走大眾化路線的意大利餐廳FAT ANGELO'S,僅存三間分店因近年投資「落重咗本」,加上重金禮聘美國廚師來港,且難敵業主開天索價的租金,迫於無奈下昨日宣佈全線結業,正式退出香港飲食市場。
記者:司徒韋桐 溫瑞麟 詹家志

於2012年接手經營FAT ANGELO'S的董事Douglas Hsia,昨向《蘋果》記者表示,對於餐廳最終結業感到無奈及可惜,「因為FAT ANGELO'S個品牌其實真係好響,好多熟客,呢兩年生意其實亦都有增長」。Douglas解釋是因為接手後重金禮聘美籍Corporate Chef來港設計新穎菜式,「佢哋負責諗好多唔同菜式,再煮出嚟,然後將烹煮過程拆細,交由唔同廚師負責。簡單講,就係制訂菜式後將佢工業化」。但是該批Corporate Chef的薪水不菲,Douglas坦言董事局的投資「落重咗本」,導致賬面出現負數。

「洗碗阿姐喊咗出嚟」

Douglas續稱,他接手餐廳後已投資了一筆資金,生意雖然有增長,但至今仍未回本,「加上搵唔到其他投資者泵水,又冇加盟店」。最致命的是FAT ANGELO'S位於尖沙嘴棉登徑豪峰軒地庫的分店,早前被業主拒絕續租,「原本每個月租30萬,我哋出到50萬佢都唔制,而西環堅尼地城分店一直係『敗家』(虧蝕),最後董事局咪決定全線結業」。
Douglas對餐廳結業深表無奈,「可惜就一定有,前日同員工講呢個消息,有啲洗碗阿姐直情喊咗出嚟,佢哋好多都係老臣子」。公司昨日已向員工支付尾糧,至於代通知金則要稍後計算。公司昨忙於處理客人之前的訂枱,同時亦要向食物供應商退款,員工亦有返回寫字樓幫忙,合力完成善後工作。
FAT ANGELO'S的菜式屬「美式意大利菜」,就是以美國東岸的烹調方式來重新設計意大利菜,最拿手的是24安士帶骨牛扒及不同餡料的薄餅,Douglas說:「用美式烹煮方法同埋食材重新去設計意大利菜,效果就係份量更加豐富。」據《飲食男女》於1998年報道,FAT ANGELO'S餐廳提供的不僅是餐桌上的佳餚,同時亦是一個充滿笑聲及歌聲的地方,為顧客帶來多一份家庭溫暖。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載