› 選擇地區
三藩市
紐約
洛杉磯
其他美國地區
香港 台灣 北美
 
2014年03月18日

隔牆有耳:尋找1937年風災後工廠
天文台長「搵條毛」 - 李八方

岑智明買到張1937年嘅打風舊相,右邊為「A.KING」船廠(藍箭嘴示),佢

天文台台長岑智明猛收藏打風舊相,佢話咁搞到自己就嚟出現結構性財赤,近期得到一張舊相,又令佢廢寢忘餐,皆因張相令佢忙住「搵條毛」。
台長一有新珍藏,都好鍾意同人分享,噚日同傳媒午宴時,佢攞出一張約3R大小嘅相片。相中有一艘沉船,岸邊有一列矮屋,台長講係造成1.1萬人死亡、1937年9月2日「丁丑風災」後嘅情景。

為銅鑼灣填海前容貌

佢叫大家估吓相中係邊度,結果成枱都冇人估中,當知道答案時都O晒嘴,原來係未填海前嘅銅鑼灣。台長洋洋得意話,呢張用幾百蚊買返嚟嘅舊相值晒啦。
過咗近80年,相中位置對比似係𠵱家維園同大坑一帶,真係滄海桑田。台長話之前問咗好多專家,都冇人答到佢,後來放大張相,發現右邊有個招牌,寫住「A.KING」船廠,攞上佢飛佛網站「Gwulo.com」(古老網)問啦,真係有人幫佢搵到間船廠資料,先至知道嗰度係銅鑼灣。

不過台長鑽研舊相興趣極大,佢又發現張相左邊有間屋,寫住乜乜毛廠,但睇唔到個名,所以又周圍找人幫佢「搵條毛」,希望有識之士幫到佢搵到間廠資料。
天文台今個月29同30號舉行開放日,台長會喺第一日下晝4點有簽名會,佢話歡迎有打風舊相人士,試吓向佢出貨。不過佢話非誠勿擾,手頭上已經有幾百張珍藏,經驗老到,一眼就知係咪罕有。
郵政署今個月27號會發售一套六款「天氣現象」郵票,台長提醒氣象迷記得買啦,仲話30日上晝會有相關神秘人出席開放日㖭。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載