蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年03月06日

隔牆有耳:
余大狀谷余大狀「進場」 - 李八方

余若薇(左二)為余俊翔(左三)造勢,實行余大狀撐余大狀。陳奕釗攝

公民黨黨魁余大狀余若薇噚日同一班黨友,力撐報名參加離島區議會東涌北選區補選嘅黨內年輕新星、同為大律師嘅余俊翔(Peter)。呢個補選緣起同愛港力走得好埋嘅隱形建制派區議員林悅,早排因企圖以欺騙手段取得金錢利益斷正,被判入獄21個月、緩刑2年,嚟緊該區8,000幾名選民點揀,真係好難話得埋。
同余俊翔冇親戚關係,但理念一致嘅余若薇話,香港現時風雨飄搖,Peter肯挺身而出參選非常難得,希望佢可以人如其名,成功殺入區議會,「進場(俊翔)成功」。公民黨另一大狀梁家傑話,Peter過去一直有為東涌居民提供法律服務,亦有做地區工作,希望現時只有一名民主派嘅離島區議會,可以再添一名民主派成員。
八方打聽過,民建聯諗過派新丁同余大狀搶位,後來覺得硬撼有難度,改為力撐教聯會黃楚標學校校長梁兆棠。睇番梁兆棠往績,除堅決力撐開辦國民教育科,仲表明將「中國模式手冊」列為校內參考書,難怪得到出咗名有「禮義廉」嘅民記撐啦!

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載