› 選擇地區
三藩市
紐約
洛杉磯
其他美國地區
香港 台灣 北美
 
2014年02月07日

旅行社踢爆 旅客要脅「唔搞大佢唔投你票」
蔣麗芸為選票忽然正義

【本報訊】民建聯立法會議員蔣麗芸昨率眾「佔領」郵輪,矢言是為扶助屬「弱勢社群」的豪華郵輪旅客。她與美麗華旅遊周旋後,狠稱對這屬「世叔伯」李兆基旗下的「大企業」表示遺憾,「𠵱家先明白有時點解弱勢社群,對大企業咁反感」。不過,旅行社踢爆她忽然正義,是因旅客動用選票及「死敵」長毛要脅她,「你唔幫我哋搞大佢,我唔投你投長毛(梁國雄)」。
記者:劉漢權 劉永明

相關新聞:霸船者可遭民事索償

記者昨早趕赴海運碼頭,在岸邊訪問仍留在郵輪的團友,相距頗遠,但有「元秋」之稱的蔣麗芸仍能在高層甲板對隔岸約10米的記者投訴:「旅行社冇高層嚟安慰大家,連一啲咁嘅態度都冇,太差啦!」
蔣稱趁新年偕丈夫遊下龍灣,每人團費1.3萬元,無法登岸觀光,失望而回。她更「參與抗爭」代團友出頭,下午1時許與美麗華旅遊代表談判時,架上黑超滔滔不絕:「團費你就袋晒,我蔣麗芸交咗1.3萬,佢又交咗幾多幾多,你就封蝕本門,佢哋就冇保障。」談判不歡而散。

至傍晚6時,蔣麗芸才離開郵輪,與旅遊業議會主席胡兆英接受訪問,而胡也應蔣要求「澄清」旅客並非霸佔郵輪。蔣麗芸聲言是為「弱勢社群」的郵輪旅客抗爭,批評美麗華旅遊「呢啲大企業,喺呢啲問題上、不經常發生嘅問題上,都絲毫不肯妥協嘅話呢。我覺得呢啲大企業,非常值得令我講一句,表示遺憾。」她說旅行社只要肯作出一點心意及賠償,團友都會開心,「因為呢架船包晒,旅行社一定好大利潤,咁你稍為讓利畀老百姓,又何樂而不為呢?」她又說見到團友捱餓很心痛,「咁多小朋友,有啲小朋友肚餓到喊啊,我見到佢喊」。

相關新聞:船公司截水截糧關廁所

美麗華高層斥旅客騎劫郵輪

對於行動影響下一班航程的旅客,她說只因旅行社態度太強硬:「我都唔想影響到下一班,我都為香港人着想,我打電話,都唔知打咗幾多次,(旅行社)後尾先派到一位嚟。」出身富裕家庭的她,雖已任立法會議員約兩年,但經過昨天的抗爭後始有所頓悟,「𠵱家先明白有時點解弱勢社群,對大企業咁反感」。
不過,美麗華旅遊總經理李振庭晚上接受商台節目《左右大局》電話訪問時斥旅客騎劫郵輪,又說曾與當時在船上的蔣麗芸多次通電話,形容蔣「好慘」,指旅客以選票要脅她,「你唔幫我哋搞大佢,我唔投你投長毛(梁國雄)」。主持人隨後再電話訪問蔣麗芸,蔣初時表示「冇聽到」有旅客以選票要脅,但馬上又說「有」。她解釋沒聽到「投長毛」言論,但承認有旅客指「蔣小姐我哋一路好支持你,你都要幫我哋呀」!
有指部份旅客曾經用錢擲職員,她否認,辯稱旅客「只係擲落張枱」。蔣表示,旅客當初並未有怪罪美麗華,只是船上美麗華職員態度惡劣,才導致事件惡化。

蘋民洗版

冼敏研
元秋,點解要佔領郵輪咁唔理性呀?

Oishi Yelu
對霸佔船隻的旅霸行為,要依法處理。霸飛機就實拉,如果霸船無法例管,蔣麗芸都有責任。上法庭判退幾多錢就最公道。

Peter Ng
蔣元秋聚眾鬧事,騎劫郵輪,勒索旅行社,知法犯法,罪加一等。

Wai Ming Pong
芸姐好野,不如即席示範跳海,表達不滿!

Samantha Lam
丟咗元秋落海餵鯊魚我願意一蚊賠償都唔要。

Zac Law
真係可惜,咁咪由佢,架船唔好返香港囉。

Tiffany Hung
人哋蔣小姐的身份是受害人,唔通自己有份都唔出聲咩?

節錄自蘋果日報facebook留言

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載