蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年01月28日

隔牆有耳:
搵葉振棠撐場 call 20,000人冒警 
正義聯盟棄劍拔咪 搞破壞 - 李八方

不怕神一樣嘅對手,只怕豬一樣嘅隊友。反佔中組織「正義聯盟」李偲嫣代表建制派,以「救急扶危」為名反佔中,組織一隊「正義糾察救傷隊」,仲搵葉振棠唱歌贈興,喺佔中當日踩場,四處挑機叫參加者唔好佔中。私煙話,呢隊救傷隊既係糾察,又係警察,會同警察並肩作戰。正義聯盟相當「正氣」,相信佔中發起人戴耀廷即使復仇者聯盟上身,都冇仇報啦。

着正義tee學功夫

私煙噚日帶咗兩隊醒獅隊去中環街頭,主持呢個招募義工揭幕禮,雖然得10幾人冷冷清清,但勝在娛樂性高。私煙公佈佢嘅鴻圖大計,話今年3月會到18區招募1.5萬至2萬人,參與佢炮製嘅正義糾察救傷隊,學急救、功夫,之後喺佔中當日踩場,呼籲參加者唔好佔中:「我哋會走入去佔中現場,但唔係同佢哋癲埋一份,我哋係做準備,如果發生危險時,我哋會救急扶危,支援警方,市民都係糾察,市民都係警察!」嘩!私煙姐,冒警犯法㗎!
明明就係挑機叫囂搞破壞啦,但私煙死口唔認:「我哋預咗俾人辱罵,預咗俾人叫我哋死開。所以我哋會安排隊員上情緒管理班、危機處理培訓。」
正義聯盟家下已有70、80位退休警察做咗隊員,而呢班正義嘅朋友當日踩場都會身穿正義tee,畀大家分清楚,邊個係「人」,邊個係「鬼」。
噚日揭幕禮仲有歌仔聽,過氣音樂人林慕德作咗首《和氣生財》贈興,歌詞離不開香港繁榮、財源滾滾、有商有量、和諧自強,主唱係葉振棠。如果想學急救、又想攞番件正義tee着,仲隨時可一睹葉振棠唱歌嘅風采,埋私煙堆都唔錯吖。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載