› 選擇地區
三藩市
紐約
洛杉磯
其他美國地區
香港 台灣 北美
 
2014年01月27日

馬會百年來首位女大董 談政改無貼士
范太:跑馬好睇過選特首

【本報訊】入閘、脫腳;墮馬、爆冷;馬場內的用語,同樣適用於馬場外的「跑馬仔」特首選舉。雖然曾在「特首沙圈」徘徊,馬會百年來首位女大董范徐麗泰卻笑稱,「馬場內嘅(賽事)好睇好多」,因款式多、競爭大,奮勇作戰而非打泥漿摔角。政改能否馬到功成?范太沒有貼士,只稱特首「跑馬仔」冇爆冷,期望2017年全民也有得「落注」(投票)。
記者:許偉賢

相關新聞:方心讓帶挈 5元贏3,000元

父親徐大統早於60年代已經是馬主,名下名駒「領寶(Rainbow)」戰績彪炳,命運自小與馬場「接通」的范太,連老公范尚德也是標準馬迷。08年成為馬會百年來首位女大董,此後同時要兼顧賭徒「心理」:「好似去到馬場要話好『自在』、唔好講『舒服』,唔通『越輸越服』咩,哈哈。」

「特首選舉冇咩驚喜」

馬照跑、舞照跳,范太受訪時坦言:「賽馬其實係香港人生活方式不可或缺一部份。」她指馬場見證香港經濟起伏,「經濟環境若然轉差,入馬場市民會減少,但呢幾年嘅入場人數、總投注額都升緊,即係香港經濟唔差㗎;(換言之)其他人覺得唔開心,係另外一啲因素,同經濟冇乜直接關係」。
要引證賽馬成港人生活文化,特首選舉以「跑馬仔」形容又是一例:參選是「入閘」、大勢已去是「墮馬」。問范太究竟是場內還是場外的「跑馬仔」好看?她搶答說:「馬場內好睇啲;我唔覺得馬場外嗰啲好睇。(點解?)馬場內嘅評磅員好叻,而且過終點時個個奮力咁去湧,一堆馬咁過,仲要係14隻馬喎;出面嗰啲跑馬仔,得嗰兩、三隻,有咩好睇呢?」但身兼人大常委的她不忘指,「外面嗰啲唔可能太多(馬)嘅;𠵱家選特首嘛,10個8個就亂晒大龍」。

政改談判「越嚟越差」

特首跑馬仔當然尚有其他失色之處,「我話唔好睇嘅理由係:我覺得馬場嗰個色彩繽紛,令大家好興奮、好投入;但係特首選舉,由曾蔭權時代開始,個個都知道曾蔭權會贏㗎啦,呢啲係冇咩驚喜。最近嗰次特首選舉,我覺得係泥漿賽」。梁振英勝出沒「驚喜」?范太笑指:「忽然彈出嚟都好似得喎……但呢種情況係唔會喺馬場出現。馬場係可以爆冷,但(特首)呢種爆冷呢,其實都係有秘密練兵,大家唔注意啫。」
市民2017年有望「下注」嗎?范太稱:「我好希望2017年有直選,市民都有機會參與。」會否「拉頭馬」?她反問「你講嗰啲造王者呀?」但她沒有祝願政改馬到功成,「𠵱家睇到情況(政改談判)越嚟越差」,只祝福港人馬年進步,重現在純種馬身上可見的拼搏精神,「香港其實冇乜嘢㗎咋,只係靠人(才);但如果真係冇拼搏心態,只係希望阿爺睇住我、特區政府睇住我……(笑說)個阿爺即係屋企嗰個……我諗我哋冇辦法行得遠、冇辦法去競爭」。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載