› 選擇地區
三藩市
紐約
洛杉磯
其他美國地區
香港 台灣 北美
 
2013年12月17日

隔牆有耳:
唔怕搞政改挫民望壞姻緣 
袁國強盛男宣言 - 李八方

身為現屆梁班子中唯一一個單身官員,律政司司長袁國強嘅感情動向一直好受關注,近期佢被委以重任加入政改三人小組,莫講話忙到冇時間結識伴侶,稍一不慎硬銷魔鬼政改方案,或者會令人神憎鬼厭,影響埋姻緣都未定。但呢位官場鑽石王老五似乎樂得單拖,噚日聲言已經將感情事「拋諸腦後」,仲大爆金句闡述「姻緣觀」㖭呀!
政改三人小組首領林鄭放大假,近期推銷重任落喺袁國強Rimsky身上,噚日佢就去到now做訪問。話說主持人講到,推動政改唔單止有可能令民望跌影響人緣,甚至可能影響埋姻緣,言下之意係呢個吃力不討好嘅重任,隨時變成生人勿近,冇人敢埋身,終身大事凍過水。
點知Rimsky聽完笑笑口,直接話:「呢個(感情事)一早拋諸腦後」,佢話唔覺得呢個係好大嘅問題,之後仲拋出金句,論緣份可遇不可求:「有緣遇到就遇到,冇緣就冇緣㗎啦」,玄妙度直逼「捍衞核心價值係最核心嘅核心價值」。唔通Rimsky想取代唐唐金句王嘅地位?

冇興趣選特首

對感情事冇興趣啫,對選特首又有冇興趣呢?Rimsky謙稱,「冇咁嘅能力,所以都唔使講有冇興趣,(笑笑口續指)雖然都真係冇乜興趣」。
咁終審法院首席法官呢個位又點睇?Rimsky強調,對法律工作嘅興趣遠超其他事,但澄清呢個法律工作包括法律研究同大律師工作。

李八方
mailto:pf_lee@appledaily.com

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載