› 選擇地區
三藩市
紐約
洛杉磯
其他美國地區
香港 台灣 北美
 
2013年11月29日

棄工程師優差 街頭賣藝 
魔術師變出好錢途

【本報訊】旺角上周起「殺街」,行人專用區開放時間,從一星期開放七天,縮減至僅周六、日及公眾假期開放。曾以此地作表演平台的魔術師歐錦豪(阿三)慨嘆:「七日變兩日,同冇咗冇分別!」。阿三由街頭表演開始,現時已擁有自己的魔術學校,連宅男女神Miss Hunny也是他的徒弟。
記者:潘婉玲

相關新聞:拍《半點收樹》寸無綫

記者看着三個魔術鋼環,在阿三手中相扣、分開,如此近距離亦看不出破綻,多得行人專用區這個舞台,「當時冇乜人識,我就喺嗰度(旺角行人專用區)練返嚟,玩魔術好需要真嘅觀眾」。
35歲的阿三是行內罕有的高學歷魔術師,2001年中文大學工程學系畢業,當了三年工程師後,突然從team leader變身魔術師,「畢業之前我係一個人,出嚟做嘢我嘅人生就完結咗」。

收Miss Hunny為徒

事實上,阿三從小愛「玩嘢」,曾以玻璃碎片折射光線整蠱途人,「見到佢地大叫『哎呀!』,覺得好好玩,哈哈!」那些年,朋輩間流行擲水彈,阿三不屑一顧,「點解要玩先?係要我得你唔得,咁先爽㗎嘛,玩你都要重複係好大鑊。」3歲定80,敢於創新的性格從此形成。
其實,阿三中學開始自學魔術,同時參演舞台劇,壓根兒就是表演的料。堂堂工程師,紆尊降貴化身小丑,雙親的強烈反彈,可以預期,「佢哋問『你可唔可以認真啲做人?』」事實上,阿三全情投入,年終無休,當年已月入2、3萬,收入比轉行前更高。
轉行後幾年,表演佔據了阿三的人生,收入大增,卻賠了健康,「我通一晚頂唔瞓,踩到有啲睡意,瞓兩個鐘,即刻起身繼續做, 三日內清晒一個星期嘅嘢」。某次舞台劇演出,阿三竟在台上打盹,才驚覺健康已響起警號。
三年前,阿三退居幕後,開設魔術學校,全職當中介及開班授徒,月入六位數,宅男女神Miss Hunny何穎璇亦是其愛徒。魔術班學生中,以追女仔為目的者,大有人在,惟失敗者居多。已有女友的阿三坦言,從沒以魔術追女仔,「根本係下下之策,要娛樂先搵你,咁你咪做咗人隻兵囉!」

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載