蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年11月22日

隔牆有耳:添好運煮重東南亞米
米芝蓮點心槽肥魚尾獅 - 李八方

將軍澳呢排似乎升咗呢,繼有高官飯局新竇嘅酒店食肆,最近仲首次有米芝蓮食肆空降㖭,就係被譽為全球最平米芝蓮食肆嘅添好運點心專門店嘞!話說添好運位於將軍澳PopCorn嘅分店開咗六日,噚日先正式開張拜神,但已經大排長龍。

其實已經有兩間分店攞過米芝蓮一星嘅添好運,已經悄悄進軍海外,分別喺4月同8月喺新加坡開咗兩間分店,畀當地人見識吓港式點心真味。老闆麥桂培噚日同八方透露,佢哋好快會進軍菲律賓㖭,最快明年初會喺當地開三間分店。佢話有一位當地富商經常嚟香港做生意,係添好運中環機鐵站分店熟客,後來仲同培哥做埋合夥人,邀請佢去當地開店,地點應該會係大型商場。

堅持用香港麵粉

培哥早已有好多進軍海外經驗㗎嘞,因為佢成日義務幫旅發局去海外宣傳,並且必定喺當地炮製招牌點心「酥皮叉燒包」。佢發現全球麵粉,以香港嘅最靚最適合做點心,係用加拿大麥、再由香港老師傅調配;佢話喺海外用過美國麵粉做叉燒包,但蛋白質太多,所以好韌,做點心唔夠好味。
為維持食物水準,培哥話會運香港麵粉去新加坡,又不時要去坐鎮,當地仲會成為海外分店培訓基地,菲律賓或之後嘅分店,職員都要先到新加坡受訓。點解唔喺香港做培訓中心?一定係培哥想畀個機會自己透吓氣,喺香港就專心做靚點心。

mailto:pf_lee@appledaily.com

足本收睇《亂噏24》x張家輝;宅男女神謝安琪隆重登場!
周一至周五《亂噏24》約定你: http://bit.ly/appletalk24

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載