› 選擇地區
三藩市
紐約
洛杉磯
其他美國地區
香港 台灣 北美
 
2013年11月19日

招牌冇王管 旺角周街「炸彈」

【記者張佩姍、金敏琍、麥超億報道】旺角一個大型棄置招牌上月底斷纜,雖然無人命傷亡,但導致彌敦道交通癱瘓六小時。事件揭示了冇王管招牌變都巿炸彈,隨時塌下殃及途人。《蘋果》巡視重災區旺角,發現不少違規招牌,亦有公司搬走多時卻沒拆走成為「無主招牌」,倘若招牌塌下傷人,賠償費用最終算到大廈業主頭上。

相關新聞:屋署亂批圖則 法團陷兩難

「太貼地」逼途人低頭過

根據屋宇署近日回覆立法會稱,全港現時約有12萬個招牌,大部份屬違例招牌。《蘋果》連日到重災區旺角巡視,發現違反招牌大小、高度規定的招牌滿街都是,以在彌敦道與南京街交界的「日本城卡啦OK夜總會」招牌為例,伸出長度達10米,橫跨旺角往太子方向三條行車線,明顯超過屋宇署「伸出式招牌」伸出不多於4.2米的規定。
位於旺角行人專用區西洋菜南街62號的超巨型廣告牌,兩個大型鐵架以V形向外伸出,單是其中一幅高度已達5.5米,長度至少6.5米,面積約為36平方米,相等於33部60吋LCD電視機面積,超出「伸出式招牌」面積不多於20平方米規定。
至於山東街47至51號的「蘇寧電器」招牌,雖然只有1米長、0.6米高,但由於屬簷篷底招牌,據屋宇署規定,離地面高度至少要3.5米,但該招牌離地只有約2.1米高,不少身高逾六呎的途人都要低頭或彎腰通過。
違例招牌多,原來部份是强行安裝,當店舖結業或搬走就被遺棄,有些只剩下生鏽鐵框。「外面嘅招牌成38年啦,我哋冇同意佢整,又冇收佢哋租,只係記得有日有人喺外面整嘢,啲人夾硬嚟」。住在旺角基隆樓40年的胡伯,單位屬自置物業,惟外牆卻遭人擅自裝上一個約六米高的招牌。胡伯憶述,當年由一間五金行擅自裝上,其後該店結業,招牌一度棄置。到一年前由一間餐廳換上新廣告,惟該餐廳三個月前亦結業,招牌依然存在。招牌經歷38年風吹雨打,胡伯亦每天提心吊膽:「我哋梗係想拆啦,打風嗰陣搖搖吓,仲會震㗎,發生意外要我哋賠錢都唔知點算,我哋幾十歲邊有錢賠?」

倘意外傷人業主須賠償

記者在彌敦道450至614號一段舊樓集中地走了一圈,發現短短800米距離已有300多個招牌,當中十多個是棄置,且大部份未經大廈業主或法團同意擅自裝上,包括已搬走八個月的金太郎壽司店。
住在彌敦大廈多年、兼任法團主席的麥榮耀直言,其大廈一間婦科診所已經遷出逾10年,但招牌沒拆走,根本無法聯絡對方要求清拆,「佢掛喺度我哋一蚊都冇收,我當然想拆啦,但係拆要夾錢,唔拆又怕有危險,都唔知點好!」屋宇署於今年9月實施違例招牌檢核計劃,招牌擁有人只要經註冊承建商進行安全檢查、加固及核證,招牌就可以「留低」,但計劃屬自願性質,目前只有約70宗登記,成效令人質疑。

相關新聞:屋企包埋外牆 業主負全責

部份違規招牌

高人險撞頭

蘇寧電器招牌離地面高度不足,逾六呎高的途人經過要加倍留神。

橫跨行車線

彌敦道一間夜總會招牌長度足足橫跨三條行車線。

儼如大電視

旺角行人專用區掛着兩幅超巨型招牌,尺寸違反屋宇署規定。

大公司棄置招牌點搞?

拖五年先拆

泰林於2008年全線結業,但招牌仍掛在彌敦道美明大廈外牆,廢置五年。近月終有轉機,相信業主會於短期內清拆。該大廈業主立案法團主席何太透露:「泰林個業主話已經入紙話拆,應該係近幾個月嘅事,不過我唔知屋宇署會幾時拆。」

無人肯負責

位於彌敦道501號的金太郎壽司於今年3月底結業。金太郎發言人黃先生稱已將招牌擁有權歸還業主,「已經將間舖同招牌畀番業主,已經搞好手續,𠵱家個招牌拆唔拆同我哋無關」。法團同樣表示跟他們無關:「招牌係個舖買埋,有乜嘢問返金太郎同店舖業主。」

唔知拆唔拆

已全線結業的加州紅卡拉OK,其位於登打士街家樂坊地庫的分店早已租出,但其招牌仍掛在達利商業大廈。管理公司億達行何先生說:「之前諗過拆,但拆又要畀錢,拆咗之後負責人問點解拆咗佢?我哋都唔知點算?𠵱家唔阻到人又冇危險就放住先啦!」

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載