蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年11月16日

隔牆有耳:
萬千熄唔熄機賀台慶?
鮑偉聰:洩憤食花生冇用

港視編審鮑偉聰

【隔牆對論】
免費電視發牌風暴突轉襲無綫,聚焦於11月19日的「萬千熄機賀台慶」。網民眾志成城撐熄機,港視編審鮑偉聰潑冷水說熄機無用,只是鍵盤戰士的洩憤式、食花生、自我滿足行為。電視迷、前立法會議員陳淑莊則指熄機等於投白票,抗議觀眾無選擇,「你唔做嘢,其實就助長緊對方繼續擴大」。
記者:雷子樂 王家文 吳嘉羚

相關新聞:隔牆有耳:陳淑莊:投白票抗議有用

記:《蘋果》記者
鮑:港視編審鮑偉聰

記:
可否說說你與無綫台慶的淵源?
鮑:
我88年入無綫,趕得及食台慶飯。嗰時喺尖沙嘴海城大酒樓筵開200席。我哋新人遠離主舞台,碟蟹肉扒鮮菇係冰凍嘅,但唔緊要,因為年輕,有熱誠,覺得能夠參與係光榮。一、兩年後(台慶飯)冇咗。後來嘅台慶日,基層員工如常返工,間中見到(公司)搭咗個台囉。我後來感覺係(台慶)唔屬於員工,變咗係話畀啲廣告客戶知佢有幾星光熠熠,將來有乜劇集。
記:
那作為觀眾,你對無綫台慶的感覺又是如何?
鮑:
讀書時,無綫台慶係呢個城市嘅重要事件。無論睇肥肥踩雞蛋,或者楊盼盼表演危險動作都好易滿足。你感覺到班藝人喺背後付出咗好多時間訓練,真係對得住觀眾,感覺到嗰個passion。後來節目開始簡單化,因佢整體方向緊縮緊。當你冇budget,就只能打開個雪櫃,翻叮啲隔夜餸。
記:台慶是何時開始有這變化?
鮑:
我緊張台慶劇多過台慶。台慶劇閒閒哋做40至60集,以前啲貨係對辦嘅,套戲要得、明星要夠份量,係要真功夫。《珠光寶氣》係台慶劇,我肯定無綫唔會再拍出一部有咁多製作費、外景,咁強勁卡士嘅80集長劇。飛機、遊艇、靚景、靚衫、豪門大戶,去法國、泰國、西藏,呢啲級數就係台慶劇囉。𠵱家台慶劇只不過係錄影廠裏面拍晒啦,冇一啲特別嘅外景,冇強勁卡士,少少哋得40集,係唔夠班叫台慶劇。
記:如何看網民發動台慶熄機?
鮑:
我覺得冇乜作用,同時又覺唔夠激。如果要做啲影響到無綫嘅嘢,斷斷唔係喺門口燒吓溪錢或熄電視,我覺得只係一啲洩憤式嘅自我滿足行為囉。上市公司考慮嘅係股價,熄機影響佢收視、形象,對佢嚟講係好邊皮嘅嘢。廣告商嘅推廣計劃其實好早已經定晒。你搞熄機,佢收視可能跌幾點。慘嘅係個廣告商,佢要同個客解畫,無綫最多派兩個低級sales去斟茶認錯,佢冇事㗎。

有人提過從佢啲廣告客戶入手囉。(記:即罷買?)不過呢個係好激烈嘅手段,唔係隨便可用,過咗龍會有反效果,啲廣告客戶係無辜㗎嘛,即係脅持人質箒,喺香港未必適合做囉。
𠵱家後生仔可能以加入無綫為恥,或以唔睇佢電視為榮,但我調轉諗,唔該你哋畢業後加入無綫。記唔記得辛亥革命點發生?係由清朝「新軍」策動。革命唔能夠由外面發生,革命係由裏面發生。
如果你有心改變電視,你唔好坐喺側邊食花生,教人熄機。加入呢個世界,用你支筆、攝影機、汗水去改變。可能唔係一年、可能係十年,可能唔係呢代,可能係你嘅下一代。但係革命始終會成功。
記:
TVB內的人,也不是未試過去改變吧?
鮑:
武昌起義都係第11次啦,如果黃花崗72烈士之後,你話畀大家聽革命係唔會成功,大家返去瞓啦,咁就冇辛亥革命啦。港視發牌失敗咗,你咪當係黃花崗72烈士囉,只要人心不死,年輕人肯入行,𠵱家坐喺度嘅既得利益層會老㗎!佢哋60歲嚟緊㗎,佢哋坐唔多十年廿年。20歲年輕人𠵱家入去,未來十年、二十年個電視行業係你哋㗎,點解要喺側邊食花生、吹水,做鍵盤戰士而唔加入𠵱個行業去改變佢呢?
記:
作為製作人,你如何看收視?
鮑:
我覺得收視只係畀廣告商睇。收視同劇集質素係兩回事。(記:如《天與地》有口碑但收視差?)呢個係好特殊例子,如果佢早兩年推,一定唔係咁嘅迴響。收視唔好呢,係佢哋呢個組合嘅風格嚟㗎。以收視唔好為榮,你哋明唔明呀?我哋係追求同行認同多啲,《男親女愛》係喜劇,但識睇嘅人都知我寫緊一啲人性,嘟嘟姐好早已做緊港女代表,黃子華做緊毒男。
我覺得entertaining係KY gel,目的係要令你生仔。《天與地》可能冇落KY gel,夾硬要同你生仔,一嚟就同你講City is dying,咁(觀眾)咪頂唔順囉,因為太乾嘛。如果你將件事講到白,呢個係忠、呢個係奸,呢個城市有希望,呢個城市係死亡,我覺得咁就唔需要戲劇啦,你可以去寫文章、去演講啦。戲劇嘅魅力係,通過好微妙嘅劇情變化、人物關係,轉九個彎令你領悟。

mailto:pf_lee@appledaily.com

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載