› 選擇地區
三藩市
紐約
洛杉磯
其他美國地區
香港 台灣 北美
 
2013年11月12日

揶揄「萬千熄機賀台慶」冇料到
阿叻囂張:收視剩三點跪返屋企

【電視風雲之全民反擊】
【本報訊】下周二無綫台慶日,網民發起「萬千熄機賀台慶」,控訴政府搬龍門踢走港視。無綫藝人「阿叻」陳百祥前日盡顯一台獨大的氣燄,揶揄熄電視行動威力有限,「挑機」指若台慶收視跌剩兩至三點:「我就跪喺度,一路由將軍澳跪返屋企!」,多名藝人也呼籲市民幫手熄電視。
記者:王麗春 白琳 吳嘉羚

相關新聞:阿叻寸爆挑機 巿民嗌裸泳

網民上月30日發起首個熄電視日,結果無綫晚上黃金時段收視率最高跌四點,流失約25萬觀眾。無綫節目其後在《東張西望》以文革式批評港視。網友決定再下一城,發起熄電視罷睇無綫台慶騷。無綫去年台慶夜最高收視36點,佔收視百分比100%,以每點收視約64,200名觀眾推算,約有231萬人收看。阿叻昨日的「挑機」,擺明是以超高門檻來玩弄網民。

袁彌明:變相為行動打氣

港版《半澤直樹》主角、港視藝人陸駿光指,無綫一台獨大,坐擁慣性收視,質疑阿叻順口開河,「佢不如大膽啲講25點樓下(就跪返屋企),無綫有慣性收視,佢開出兩、三點成績,係同亞視同一層次,唔夠型,又冇『吉士』」。港視另一藝人艾威指,熄電視行動反映公民意向,「如果台慶收視得兩點,我就同阿叻一齊跪。大家想見到我跪,就幫手熄電視」。無綫出身的前港姐袁彌明指阿叻言論變相為行動打氣,「佢咁做激發網友熄電視,佢嘅說話同相片,會變成大口號同icon。大家有一股怒火喺台慶放出嚟,最好唔只淨係台慶,日日都熄電視日」。她又批評收視報告的計法有問題,「佢哋只係計啲舊款電視,我從來唔信佢哋嘅收視點,只係無綫用嚟吸廣告」。now主持梁思浩說:「佢點解只敢講兩至三點,又唔敢講九點?」
事旦男何家泰相信,阿叻言論反映無綫高層心聲,「阿叻係一台獨大產品,佢可以囂,因為有政府偏幫」。他計劃屆時到無綫門外示威。保衛香港自由聯盟昨晚在政總舉行集會,促特首梁振英不發牌,就立即落台,約50人出席,部份市民批評無綫與亞視節目質素低劣,他們將擺街站促特首不發牌就落台。

相關新聞:恐收視跌 客戶或抽廣告

陳百祥惹火言論

無綫藝人陳百祥:
「我哋係為唔熄電視嘅人表演,我哋點都有一定收視點。如果可以熄到得番兩、三點(收視率),我就跪喺度,一路由將軍澳跪返屋企!」
「記得熄晒㖭呀,要掹埋電掣,費事唔覺意俾啲貓貓狗狗踩返着個電視。呢個世界怕熄機嘅就唔好做人,怕人杯葛我就冇今日啦!」

港視藝人扯火反擊

【成功陪佢跪】
艾威:
「如果台慶收視得兩點,我就同阿叻一齊跪,大家想見到我跪,就幫手熄電視。」

【寸爆冇吉士】
陸駿光:
「佢開出兩、三點成績係同亞視同一層次,唔夠型,又冇「吉士」!」

市民有話說

【唔使理佢】
吳女士:
「唔使聽佢(陳百祥)講乜啦,我唔睇電視好耐,會叫身邊啲朋友一齊熄電視。」

【辣㷫港人】
許先生:
「阿叻講嘢係刺激性,今(昨)日我已經同朋友不斷share出去俾人。」


足本收睇《亂噏24》x楊千嬅;緊接落嚟 Miriam繼續同你談談情,吹吹水!
周一至周五《亂噏24》約定你: http://bit.ly/appletalk24

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載