蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年10月27日

逾8成「大眼仔」 易甩色黏菌多

市面上出售的「大眼仔」,鏡片的安全性及顏料質素欠保證。易仰民攝

【本報訊】潮男、潮女愛在萬聖節派對戴「大眼仔」等彩色隱形眼鏡,通街「扮鬼扮馬」,但要留意箇中危機。理工大學測試市面15款彩色隱形眼鏡,其中13款(即約87%)的色素只塗於鏡片表面,可被擦拭,其黏附細菌數量更比夾層設計鏡片最高多18倍,可增感染風險。專家提醒市民切勿在互聯網或「格仔舖」胡亂購買來歷不明的大眼仔。
被測試的15款鏡片在格仔舖、互聯網或視光中心購買,每個品牌測試5隻鏡片。其中13款鏡片未能通過擦拭測試,即輕易被棉花棒擦走顏色,顯示並非以夾層或嵌入式方法加入色素,而是只將色素塗於鏡片表面。

避免連續戴逾四小時

研究員再測試鏡片黏附細菌的程度,將鏡片放入培植了大量綠膿桿菌的瓶子內,經一晚後作化驗,發現該13款未能通過擦拭測試的鏡片,全部黏附了大量綠膿桿菌,介乎70萬粒至190萬粒。若比較夾層設計的鏡片黏附約10萬粒細菌,最多差距18倍,數字十分驚人。
負責調查的理大眼科視光學院教授曹黃惠華指出,色素塗在鏡片外層,可致鏡片不平滑,不但可令眼睛受傷,還容易黏附細菌,增加佩戴者受感染風險。若市民錯選質素粗劣、色素來源不明的鏡片,更易出事。
她說:「為增強嚇人效果,有廠商自行為彩色隱形眼鏡表面加添顏色,令鏡片透氧度更低。部份鏡片色素又太厚,對眼睛唔健康,佩戴一、兩個鐘就要除低,如平時唔戴開隱形眼鏡,萬聖節先戴,要避免連續使用超過四小時」。
她強調,市民未諮詢視光師意見,自行購買大眼仔十分危險,尤其網購或在格仔舖購買,鏡片的安全性及顏料質素都欠保證。
部份人使用隱形眼鏡方法亦有錯,如與朋友交換戴鏡片、用水喉水浸洗鏡片,或將一次性即棄鏡片分開多次使用等,都增加感染風險。建議應在視光師協助下,先評估是否適合戴隱形眼鏡,並選擇符合眼球弧度的鏡片,學習正確護理鏡片程序,有助保護靈魂之窗。

藝人用家意見

Mia:
「我自己都知道比普通隱形眼鏡容易滋生細菌,本身我眼珠有啲細,上鏡要靚啲,所以冇辦法,但我會好注意清潔,用完會即刻洗,一個月會換一副,覺得咁樣會冇咁易有細菌。」

朱晨麗:
「3、4年前好流行戴大眼仔,我都試戴過一、兩次,完全係貪玩性質。戴咗之後有啲發炎,都幾辛苦,加上自己冇近視,唔係好識戴同除。聽到惹菌都有啲驚。」

莊思敏:
「以前一路都有戴color cons,後轉戴大眼仔。都知道color cons表面有痕,容易藏細菌,所以揀咗每日即棄款,但始終冇普通cons咁透氣,對雙眼影響較大。」

鄭中基@谷德昭搞笑孖寶再發功,笑彈繼續嚟!
周一至周五《亂噏24》約定你: http://bit.ly/appletalk24

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載