› 選擇地區
三藩市
紐約
洛杉磯
其他美國地區
香港 台灣 北美
 
2013年10月06日

揸把剪六十年 暴動最好景

兩位八旬的師傅,兩張過百年的飛髮椅;年青一代也許未能想像有剃鬚、修剪眉毛和剪髮的全套服務,但對老一輩來說,卻是享受。走進西營盤第二街橫巷的友記理髮,聽著粵曲,彷彿回到理髮只要五毛錢的年代。
記者:程詩敏 攝影:馮就康 江俊豪

陳師傅當年在東莞學師,來到香港,未夠20歲已經開舖,後來跟三個行家合資開友記。如今其中一人經已過身,84歲的他仍然精神矍鑠,跟86歲姓胡的師傅,被街坊稱為一肥一高。「做得就要做架喇,無所謂,為下大眾,我地呢啲自細做慣,唔會話辛苦。」剪髮剃鬚由6、70年代的七毛錢,加價至60元,但仍是區內平民價。

街坊林先生六十年代初已經在友記剪髮,「七十年代,我仲帶埋幾個細路嚟剪,剪到佢哋10幾歲,開始懂事喇,就話呢啲老土,係我哋剪嘅,哈哈。」友記現時客人主要都是上了年紀的男士,街坊經過門口,就會坐在舖外木櫈閒談,話當年。陳師傅回想剪髮佬最好的時代,竟賺得比公務員還多,「做我哋呢行,愈多事更好,太平盛世反而不好;暴動嗰時個個排隊剪髮,因為頭髮長,警察當你飛仔辦,就算冇事都留難你先啦。」

從前剪髮都要剃鬚,今天兩張有一百年歷史的二手飛髮椅,早已經絕版,但師傅的手勢仍然嫻熟,「剃鬚手腕要軟熟,揸柴刀咁唔得架,刮親人咁就麻煩。」忙起上來,一個下午剪10幾個客也未見疲態,「你睇佢對手,就知呢位師傅由細學師,我哋啲手指好細架。」陳師傅開的是廣東理髮店,與穿白色袍,會遞香煙的上海理髮師傅,是兩碼子的事,「廣東人,咩都好過佢哋嘅,啲客倒返轉頭俾煙我食呀;我揸把剪60幾年,唔係60幾日呀。」

愛地球 齊齊Go Green: http://green.appledaily.com/

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載