蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年09月14日
馬上成為壹會員

隔牆有耳:團體倡取消通識科必答題
立會議員梁美芬︰避免政治騎劫!

【隔牆對論】
新高中課程通識科,原意培育學生獨立思考;討論社會時事有助學生提升批判力,但有團體卻認為通識不應偏重政治,力倡通識去政治化。發起「關注通識教育聯席會議」的經民聯立法會議員梁美芬稱,要求取消通識科必答題,只是為免通識科被政治行動騎劫,絕非要求一刀切不談政治;教協教育研究部主任兼通識科教師張銳輝認為,建議通識去政治化,才最政治化,質疑提出去政治化的團體是否只要求學生做順民。
記者:許偉賢

記:《蘋果》記者 梁︰立法會議員梁美芬

於2009年開始的新高中課程,通識教育科是四個核心科目之一;立法會議員梁美芬稱當年收到學生及老師投訴,開始關注通識科考核問題,但事隔近四年才於近期牽頭組成「關注通識教育聯席會議」,力促取消通識必答題,理由是太側重政治。
記:為何事隔幾年才組成聯席會議提出建議?
梁:其實呢四年嚟我一直對牛彈琴;直至成立聯席,先至有response(回應)。對細路仔(中學生)嚟講,點解要一試定終身?點解入大學要咁計分?(當年投訴)令我留意到通識內容無邊際。其實連英國大學都唔承認呢科,香港compulsory(强制),何苦呢?咪畀大家揀囉,叻仔嗰啲咪去報囉,唔使一定要考試㗎,唔需要設必答題㗎。如果要睇同學嘅分析能力,任何題目都可做到。
我都嘗試代入同學去諗,政治與行政學係我first degree,我算讀得唔錯㗎,但都認為呢科考題係深㗎。例如有考題係肥胖全球化,可能牽涉到WTO(世貿)、trade barrier(貿易壁疊)或者monopoly(壟斷)喎,真係好難答,PHD(博士)、Master(碩士)都係佢哋可以做嘅題目,至少都係大學畢業、甚至係openbook嘅題目。所以呢科對中學生嘅難度,我係好sympathy(同情)。
記:換言之你反對通識必答題是因為反對內容艱深及考核方式,為何聯席卻以去政治化為原因?
梁:我從來冇講過通識科唔可以教政治。我覺得呢個真係屈,係一頂帽戴落嚟。我只不過話考核嘅方式應該檢討。如果真係要考,可唔可以取消必答題,全部elective(選答)?畀個choice(選擇)老師同學生,佢哋relax(輕鬆)好多。唔會特別有同學enjoy考試㗎,轉個方式open book或者take home(家課)都得㗎。如果話必修,若高考要計分,學生係咪交份paper就得呢?唔使畀呢科整死。

聯席其中一項建議是通識教材不能偏頗,而教協推出的佔中教材,便被聯席批評偏頗,有洗腦之嫌。
記:通識科偏重政治化議題是否因為佔中而生?
梁:其實成個討論係因為教協出咗佔中教材。有啲補習天王話:舊年必答題有拉布,今年仲唔係佔中?搞到全城家長學生都panic(慌亂),老師都話要點樣惡補。如果通識教佔中,我唔同意……佔中係有機會犯法嘅,個教協佔中教材講埋幾時幾日去做,我覺得就算討論佔中,都唔需要傾到咁細緻。呢啲題目唔適合攞入必答題,但選答題可以,點出都冇問題。(記︰政改呢?)冇問題,啲人去立法會外露營,反高鐵嗰時(包圍立法會),冇問題㗎,可以傾。
記:那很難界定甚麼可以或不可以列必答題。
梁:政治爭議議題可以分類㗎。例如探討型,好似進行中嘅佔中,都未有定論甚至未發生。但如果爭議完又有定論嘅,例如皇后碼頭司法覆核,有環保又有法律角度。外傭或者港珠澳大橋爭議,有人權同本土睇法,法庭又有判決,可以傾㗎。
其實通識唔係唔可以教政治,但要教仲有好多可以教,咪elective question,鍾意點講咪點講,激進主義、公民抗命都可以傾㗎,講理論係可以㗎。我只係提出唔係必須考試。我覺得話避免通識被政治行動騎劫更加具體。我深明好多嘢都同政治有關。但教政治唔係淨係講棵樹、應該講個樹林。
有說聯席此時推動通識去政治化,與學民思潮成功反國教有關,擔心中學生太投入政治運動。
記:聯席的行動與國教有否關係?是否擔心學生有批判力?
梁:呢個真係無稽之談。我哋(聯席)連中史科都唔提,就係費事啲人將件事掛上去國教。
我後生嗰時都係屬於反叛㗎,所以我對同學有特別批判能力完全唔介意,其實佢哋有批判力,甚至challenge(挑戰)老師觀點我都覺得冇問題。但考試應該係考分析,唔係帶動緊一個行動。
記:是否支持老師要申報政治聯繫?
梁:我哋唔係提出嗰個團體,我亦覺得唔需要,因為只要畀到freedom(自由)學生同老師,等佢哋可以揀題目,令佢哋考得好唔好都會心服口服就足夠啦。我相信經過呢輪討論,有啲大家擔憂嘅嘢,一定會減少。

mailto:pf_lee@appledaily.com

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載