蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年08月27日

有錢有人氣 冇錢唱衰你
召妓指南網站 三招屈鳳姐

【本報訊】尋歡如開飯,盡信網上正評隨時「中伏」。全港最大色情網站sex141.com近年屢出新招,美其名方便嫖客選擇人氣「囡囡」和交流「不爽」經驗,但有鳳姐踢爆,所謂人氣榜,任何人只要付錢就可以上榜,而專門結集負面評語的「跌錢報告」區則由網站自己人「老作」,鳳姐要付錢才可刪除,網站的真正目的是向鳳姐屈錢和逼她們向寫手提供「免費餐」。

專門協助性工作者的組織紫藤和青鳥,近年不約而同收到姐姐仔投訴,指sex141.com大出「花臣」壓榨「囡囡」。在觀塘當一樓一鳳的嘉嘉指,網站為了「屈錢」無所不用其極,她因被網站狙擊近4個月,收入大減,決定挺身揭露該網站的賤招。
嘉嘉指,sex141.com過去一年新設「今日之星」欄目,名義上是紀錄客人送花給姐姐仔的數目,收花越多,人氣越高,但收款的不是花店而是該網站,送的不是真花而是網頁上的玫瑰花icon,「每支花10蚊,每次最少送30支,有效得嗰24小時,點會真係有客買呀?咪又係自己買,個客每日畀得300蚊買花畀你,不如直接包起你啦係咪?」

唔肯畀錢繼續中傷

打開141網頁,有鳳姐收花超過140支,「即係未開工已經要攞千幾蚊出嚟,但真係有人信佢咁受歡迎,羊群心理走去幫襯㗎喎」。至於討論區內的「爆鐘卡」欄目,運作模式與買花相似,「爆鐘卡」10元一張,每次至少買100張,「即係最少都要1,000蚊,啲人買開一次過1,000張,啲女仔為咗爭頭幾名,每日使成5、600蚊。」
而令姐姐仔「最傷」的,是美其名讓客人分享負面經驗的「跌錢報告」區,「啲寫手或者客人約唔到啲女仔出街,寫你有性病,話你又老又醜,連你廣告條link都擺埋出嚟」。
鳳姐要刪帖,每帖盛惠200元,若被「唱衰」的鳳姐本身非該網站廣告客戶,更要先付200元入會費、首月1300元廣告費,再付200元刪帖費,才能抹走一則負評,「如果有辦法證實,我心服口服,但其實乜人都可以寫,唔會審查,話要捍衞言論自由,如果言論自由咁緊要,就應該連200蚊鏟post費都唔好收啦,其實咪又係想榨乾啲女仔」。
若鳳姐不肯乖乖付錢,寫手會繼續追殺,「日日中傷你,一時話你石頭波,一時話你洗碗阿姐咁嘅樣,120磅又寫到170磅,話你4個仔女、6個仔女,啲男人聯想到你生咁多個,都唔使嚟搵你啦,好多人為咗搵食咪向佢屈服囉,啲版主當食免費餐係佢份工嘅福利,同啲女仔開房唔肯畀錢,大大聲講『我食女從來唔使錢』!」

正面報告每份500元

嘉嘉亦因拒絕客人約會,結果被抹黑,「我同佢飲茶又冇錢收嘅,點解我要去唧,不如早啲返工搵錢,佢同啲版主熟,我唔聽佢電話,咪叫人寫衰我囉,話我50歲,話我偷錢,有個仔20歲,寫我有性病,周街都係女,有女朋友同老婆嘅都唔會嚟幫襯啦」。
這些負評令嘉嘉的生意大插水,「以前一日搵幾千蚊,日日有客排隊,有啲客排兩個鐘,行吓又返返嚟,等5個鐘都試過,𠵱家一日得兩個,我收400蚊一個,你話我點生活?我知道點解決㗎,我一向佢就範,搬去佢屋企住咪冇事囉。」另一方法是幫襯寫手寫「正評」,「如果係官方寫手就1000蚊3份,一個月要用晒,如果非官方就500蚊一份,逐份計,你始終都要入局,挽回聲譽。」
嘉嘉說,有姐姐仔被「追殺」逾年,情緒大受困擾,「佢同我講想自殺、想死,我咪勸佢唔好,冷靜啲,但上高啲人太惡,太有勢力,蝦啲女仔求助無門,令你無辦法生存,我哋唔做呢行仲可以做咩呢?」

一副24字的對聯影響蔡瀾一生,今集《亂噏24》,蔡瀾為你逐句解釋!
點擊以下連結,全集即時重溫!
http://bit.ly/appletalk24

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載