› 選擇地區
三藩市
紐約
洛杉磯
其他美國地區
香港 台灣 北美
 
2013年08月20日

隔牆有耳:
自己抹黑人 竟稱人言可畏 
偲嫣自比阮玲玉 - 李八方

月初旺角一場鬧劇,香港家長聯會會長李偲嫣「慘被」圍攻,成千人當眾送上最親切嘅問候,兩日後《蘋果》仲踢爆佢曾經破產、財政混亂。俾人蝦咁陰功豬,偲嫣姨姨點會啞忍?噚日就約埋撐警察嘅香港行動去特首辦遞請願信。

遞請願信去錯地方

下晝兩點半,十幾間傳媒準時去到門常開西面特首辦門口,但呆等十幾分鐘,警察叔叔話,佢哋去咗東面嘅政府總部遞信,成班行家激到紮紮跳。去到成三點鐘,一行近四十人至過返特首辦叫口號,香港行動召集人冼澤正冇講點解搞錯地點,只講句唔好意思,就大鬧當日聲援林老師、佔領舞台嘅人係「邪派亂黨、妖獸喪屍」,又試撩交嗌。
李偲嫣之後再帶同二十幾人去私隱專員公署遞投訴信,不滿《蘋果》爆料侵犯佢私隱。佢話《蘋果》報道不實、政治打壓同抹黑,係對佢個人誠信同人格謀殺,令佢生意受影響、對家人造成「難以估計嘅終生傷害」,短期內佢會再發律師信咁話。
李偲嫣話如果喺20年前就可能捱唔過呢啲「打壓」,但今時今日夠堅強,「既然我已經俾人剝晒光豬、唔死都一身潺,所以決定企出嚟,同佢(《蘋果》)鬥片到底!」佢又話,有朋友SMS支持佢,話終於知道阮玲玉當年點解會死,因為「人言可畏」喎。阮玲玉咁樣俾人抹黑,唔知有冇人想幫佢討回公道呢?

mailto:pf_lee@appledaily.com

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載