› 選擇地區
三藩市
紐約
洛杉磯
其他美國地區
香港 台灣 北美
 
2013年07月31日

專題人物:女CEO冒死懸崖釣大魚

磯釣,是指在人迹罕至的海岸或懸崖峭壁,迎着海浪垂釣,刺激而危險,近年因此喪生的意外時有發生。
但一名平日穿迷你裙高踭鞋的港女,偏偏愛上此道,一個人披上風褸換上釘鞋,背着工具到海邊捱夜。鹹風割面,樂此不疲。
身邊闊太朋友話題圍繞潮物手袋何時減價,她關心的卻是何時能釣大魚,如此沉迷,只因被大海的神秘吸引着,「海洋生物變化萬千,你永遠唔會知道下一刻有乜嘢魚上釣」。
記者:羅鈺歡
攝影:胡堅

家境富裕的港女Sunhee,在美國大學畢業後回港,接掌家族印刷生意,是公司內人人懼怕的CEO。外表是女強人,但她坦言內心深處只愛大海,「細個逢星期日爸爸都會帶我到愉景灣釣魚,無憂無慮好開心」。她說到人大了,無形的工作壓力使人疲倦,一有時間就想回到海邊。「你永遠唔知會釣到乜嘢魚,喺你等到絕望嘅時候,忽然見到有大魚游過,係最令人興奮」。

曾笑磯釣儍 一試上癮

她以前喜歡跟人坐船出海釣魚,成功感是以收穫重量來計算,「南海油田啲魚好大條㗎,只要船家揀好有利位置,一定有好多魚穫」。那時Sunhee在船上望過去,很看不起岸上一班磯釣友,「着到又紅又綠,又成身工具,而且企足一日先得幾條魚,啲人都儍㗎,攞嚟辛苦」。
但每年到了10月,冬天浪大無法出海,自己釣癮起時只好也去做「儍事」。結果她一接觸磯釣就已上癮,最後連坐船出海也不想了,原來滿足感不是以量計,而是當中的過程。
她說磯石釣魚最吸引之處,就是夠刺激,且只有自己明白,「去嗰時三更半夜,返嚟時就污糟邋遢,阿媽成日話我,好人好姐做乜嘢搞到人唔似人,鬼唔似鬼,成日夜麻麻出去瞓石」,但她卻反駁道,磯釣其樂無窮,因為這是一項鬥志鬥力鬥運氣的活動,「去目的地前要攀山涉水,到達後見靚風景已經係一種relax,乜嘢辛苦都唔記得晒。而且魚竿嘅重量、魚絲嘅運用、水流方向、地形沙石,以及放誘餌份量同位置等,種種因素都會影響結果,但即使做足準備,如果欠運氣,企成日都冇魚上釣」。

得獎無數 鍊贏男釣友

過程也比結果重要,所以有時魚絲被扯斷都好滿足,「享受上釣過程,人同魚一場決戰」。日釣夜釣,她練出一身本事,贏得世界各地多項釣魚界大獎,包括名釣會、GAMA杯、Shimano及Sunline杯等,香港一眾磯釣男也甘拜下風。
磯釣最重要工具之一是浮波,浮波乘着水流引誘大魚上釣,所以對Sunhee來說,她最愛的收藏品不是手袋,而是各款浮波。「手製浮波每粒都獨一無二,好多浮波品牌都係出自資深釣手,佢地用多年釣魚經驗研發,每款都有獨特嘅釣法同元素,包含唔同釣手嘅心血」。
丈夫得知她的獨特興趣後,為求紅顏一笑,私底下去聯絡一間停產的浮波生產商,想為她訂製獨一無二的浮波,「日本人薄墨賢二係好出名嘅生產商,出面傳聞佢老婆去世後,佢就停做浮波,我老公聽我講完,就嘗試email個老闆,仲一五一十將自己想法講出,希望感動對方再做一次浮波,點知冇幾耐收到對方email以英文回覆,頭一句就係『其實我未死,這個也不是天堂寫來的信』」,原來薄墨賢二的妻子健在,還親自回信,鬧了個大笑話,大家從此成為了好朋友,浮波供應也因此長年不絕。
身為人妻的她也投桃報李,以保護自己作為對老公最好的回報,她許下承諾,在打風落雨的危險天氣不會釣魚,而平日也要做足安全措施,最重要保養好自己皮膚,「我都怕曬黑同皮膚癌㗎,人哋係搽太陽油,但我係太陽油面膜,搽到好似日本藝妓咁白,長袖衫、包頸帽同太陽眼鏡都齊全!」

你想爆?幫你爆!

熱線電話:2990 7225
mailto:Bom@sharpdaily.com.hk
WhatsApp:9131 4511

杜汶澤、彭浩翔初會蔡瀾、黎智英!仲未睇?
第三集《亂噏24》足本放送中,即上:
http://bit.ly/appletalk24

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載