› 選擇地區
三藩市
紐約
洛杉磯
其他美國地區
香港 台灣 北美
 
2013年07月31日

隔牆有耳:
清朝講排場 狼朝有出醜局長 - 李八方

港男港女每日出街前淨係揀衫都有排揀,原來清朝皇帝后妃都一樣,講究程度隨時誇張過一眾青春少艾!
滿清嘅宮廷服裝堪稱歷代最嚴謹、最複雜,細微到頭飾鑲咗幾多粒珍珠,都象徵住皇后同妃嬪嘅遙遠距離。歷史博物館今日起到10月7日,展出130件專程由故宮博物院運嚟香港嘅清朝宮廷服裝,幾乎將皇帝、皇后、同妃嬪日常會着嘅衫大晒冷。

睇溥儀登基龍袍

部份展品更加係首次曝光,例如末代皇帝溥儀三歲登基時嘅龍袍,連故宮博物院都未展出過,極之珍貴。
館長翁怡話,清朝服飾融合滿漢色彩,唔單止吸收漢族嘅用色同花紋風格,以黃色同龍紋代表尊貴身份,亦保留滿族騎射、游牧特色,例如馬蹄袖、大披領,又經常用動物皮毛保暖,以示不忘本。

除咗顯示身份,最高規格嘅禮服仲要講求天人合一,好似皇帝嘅祭祀服裝咁,就要配合唔同祭祀對象決定顏色,黃色祭地、藍色祭天、紅色祭人,相當講究。清朝後期更加受西方文化影響,例如光緒皇后就整番件「瘦身版」朝裙,同傳統又闊又直身嘅朝裙差幾個碼,都幾潮㗎!
館方隆重其事搞咗個開幕典禮,有曾德成表演媲美崔世安嘅「標準」普通話,聽到在場記者一頭霧水。八方將段錄音聽完又聽,終於知道局長原來引經據典,用《易經》嘅「黃帝堯舜垂衣裳而天下治」講服裝對中國文化有幾咁重要,不過……就讀成「枉啲堯孫」,睇嚟下次拋書包前要再惡補吓喇!

mailto:pf_lee@appledaily.com

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載