› 選擇地區
三藩市
紐約
洛杉磯
其他美國地區
香港 台灣 北美
 
2013年07月17日

隔牆有耳:菜譜暗藏玄機
曉明BB也愛釀涼瓜 - 李八方

政界呢期興起「釀涼瓜」風潮,呢味餸係唔可以同「梁粉」一齊食嘅,而立法會噚日宴請中聯辦主任張曉明,菜譜都暗藏玄機。有心水清者話八道菜之中,頭盤「涼」拌窩筍、主菜之一蟹肉蛋白「釀」玉環以及其中一款甜品南「瓜」餅,仲唔係意有所指?據講曉明BB席間開懷大嚼碟碟清,開胃到極,惹人遐想。

相關新聞:議員送禮 表達訴求

西環女將冧爆合照

呢餐由立法會主席曾鈺成拉攏嘅破冰飯局,一如以往搵西環皇家太平洋酒店到會。呢間酒店乃係西環幹部「飯堂」,但據知立法會搵佢哋嘅原因,只係因為貪平,同西環無關。以今次為例,八道菜每位350蚊包埋酒水,相對其他酒家或酒店近千蚊一位,確實好抵。
做生意難免將貨就價,所以餸菜份量比較少,唔少食飯嘅議員都話噚日餐飯冇乜廚餘,年輕力壯嘅張曉明更加食量勁,餸菜一上幾乎碟碟清,唔會係因為醞含「釀、涼、瓜」嘅菜式,令佢越食越開胃啩?
對同場嘅西環女愛將,曉明BB似乎先係主菜。民建聯新界東葛珮帆EQ,未上菜已經攞住相機衝去張曉明前猛影,之後仲拉住對方,含羞答答咁合照。九龍西鼠王芬點可以被比下去?當張曉明喺會議廳影大合照時,佢一個箭步揳咗個靚位,以勝利者姿態留下最親近曉明BB嘅一刻。但觀乎曉明BB兩次合照,表情似乎都有啲勉強咁,唔通自覺「無福消受」喎!

李八方
mailto:pf_lee@appledaily.com

倪匡、蔡瀾同肥佬黎約埋一齊《亂噏24》,你睇咗未?
唔睇冇話題,第一集足本放送中!速上:
http://hk.apple.nextmedia.com/livestream/channel/talk24

相關新聞:「寸嘴」與泛民舌戰

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載