蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年07月06日

隔牆有耳:
囍歡里死撐 稱內容比名重要

13,908
黃遠輝
市區重建局非執行董事、城市規劃委員會副主席、長遠房屋策略督導委員會委員等,被視為梁振英政府房策「公職王」。

【隔牆對論】

記:《蘋果》記者
輝︰黃遠輝

記:灣仔利東街重建項目商場命名為「囍歡里」,引起社會爭議,舊商戶、居民及網民認為肉麻、低俗,你如何看待今次的改名事件?
輝:個名一出嚟大家都已經好多意見,覺得非常之負面,講真,點樣改名係好見仁見智,因應市場唔同時間改唔同嘅名,所以唔應該一開始將個名定性為負面,又或者已經冇進行保育,或者同最初重建嘅承諾唔同。基本上冇講到一定要用番原來(利東街)個名,甚至原來係乜嘢名都冇正式講,因為囍帖街係自然形成,大家習以為常叫囍帖街。

記:舊街坊指改名目的是鏟除利東街(即俗稱囍帖街)歷史和文化,你有甚麼意見?
輝:我反而覺得應該注重內容,商場會以婚姻為主題嘅形式出現,所以以前嘅囍帖公司有機會再出現,加上其他同婚姻有關行業包括婚紗、攝影商戶,商場到底會唔會有一啲舉行婚禮場地,或者拍攝場地畀新人影婚紗相呢,最終要睇商場內嘅店舖係咪可以沿用同婚姻相關的主題。但既然有咁多關於個名嘅意見,改過個名都唔係一件好難嘅事,畢竟一個商場嘅名唔係咁重要,有好多商場改過幾次名。大家應該集中注意商場內嘅店舖,係咪可以保留囍帖街專為新婚夫婦服務嘅氛圍更重要。
講到保育個名唔重要,香港曾經係英國殖民地,有啲地方都冇再用以前嘅名,好似前港督府,𠵱家唔叫港督府,但有冇影響到𠵱家嘅禮賓府,除咗入住嘅主人唔同,基本上佢嘅外圍、內部,甚至以前嘅擺設冇改變到,喺呢個角度睇,究竟個名係咪有必要沿用以往嘅名,相反我寧願內容能夠保育到以往嘅氛圍,我覺得比較重要。

記:發展商表明囍歡里目標商戶以精緻品牌為主,如鐘錶珠寶、時裝店等,你覺得重建保育後,是否只有高檔品牌商戶才可以進駐?
輝:未必高檔先得,最主要係咪切合到商場主題,如果完全同個主題(婚姻)冇關連,你放一啲非常高檔品牌入去,對商場有乜嘢好處呢?有咗呢個主題要好小心篩選商戶。但講到金飾、珠寶唔可以話同新婚冇關係,中國人習慣結婚都需要金飾、珠寶,所以有呢一類嘅商舖都切合主題。相反如果有名牌手袋,我唔覺得有邊對新人會有多餘時間挑選名牌手袋。

記:利東街等市區重建會破壞舊街坊、商戶的社區網絡?
輝:任何重建冇辦法做到百分之一百不變,但呢個係咪被視為破壞呢?要考慮到同一時間保留落嚟嘅(建築物),同埋重建為原來居民、商戶帶來嘅究竟係好處多,定壞處多,兩者需要作平衡考慮。但最主要希望大部份舊居民、商戶喺重建地區可以得到充份照顧,我相信當區居民好多都喺其他地區自置物業。對於商舖嚟講,部份喺鄰近地區重新營業,我上一個星期去睇過,見到好多原來嘅囍帖公司喺隔一條、兩條街開番,除了印囍帖仲加咗其他業務。

記:近年不少歷史建築活化後都成為貴價餐廳、大型連鎖商場甚至豪宅,有保育團體認為是「推土式重建」,你如何評價這種市區重建、保育的方式?
輝:任何保育都有一定嘅價值,同樣有一定代價,每樣嘢要保留40、50年嘅前社區網絡、氛圍,甚至商業活動,但以今日嘅成本或者經濟考慮嚟講實際上好大困難。𠵱家可以做到希望盡量喺成本投入嘅同時,做到某程度上嘅保育。畢竟市區重建係用公帑,點樣善用公帑既能達到發展目的,又保育到大部份氛圍、建築等,要作出適當考慮。
就好似和昌大押,我相信保護咗建築物嘅本身,但究竟點樣善用內部空間,其實經過好多考慮,我嘅理解早前的確係名店,咁有特色建築物,同埋位置係灣仔,名店興趣大,出到嘅租金更加高,但最終冇按照價高者得原則,咁多選擇下最終揀咗餐飲服務比較適合,公眾可以感受以往內部間隔、氛圍,去食個午餐、飲杯茶,已經係眾多選擇下,盡量找到一個比較平衡嘅商戶。今日保育意識大家提升咗好多,我都贊成香港需要就整體保育制訂全面保育政策。

記︰你覺得市建局是否一個發展商?做發展商與協助舊區居民改善生活,那樣行先?
輝:我自己當然唔覺得市建局係一個發展商,究竟主席(蘇慶和)喺邊一個場合提到,或者有前文後理我唔清楚,但從我角度嚟睇,市建局有自己嘅使命,有別於發展商,應該透過重建改善香港舊區環境。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
香港 台灣 私隱聲明 服務條款 刊登廣告 聯絡我們 招聘 訂閱版: 飲食男女|    Ketchup|    壹週刊
© 2017 AD Internet Limited. All rights reserved. 版權所有 不得轉載