› 選擇地區
三藩市
紐約
洛杉磯
其他美國地區
香港 台灣 北美
 
2013年07月06日

隔牆有耳:爭取保育vs市區重建

【隔牆對論】
利東街變囍歡里,遭一面倒批評與嘲諷。當年極力捍衞利東街的灣仔區議會主席黃英琦說,市建局食字食到忘本忘歷史,囍歡里讓她憤怒:「條街應該叫番利東街,改乜嘢名都係有問題!」
市區重建局非執行董事黃遠輝認為名字好壞見仁見智,最重要是內涵,承諾日後商場會讓昔日囍帖街的商戶進駐。項目名字遭千夫所指,黃遠輝想了想說,再為項目改名,並非難事。
記者:姚國雄 譚靜雯

相關新聞:隔牆有耳:囍歡里死撐  稱內容比名重要

死守利東街 斥市建局冇文化

記:《蘋果》記者
琦︰黃英琦

市建局2004年開始收購俗稱囍帖街的利東街近647個業權,2,000名居民受影響。重建後的商場連住宅項目料明年落成,重建令利東街消失,取而代之是發展商的所謂「步行街」項目,早前發展商將項目命名為「囍歡里」,被指庸俗,遭各界狂轟。

記:當你聽到利東街變了做囍歡里,你有何感覺?
琦:我覺得市建局太過份,我好憤怒,我當時身在美國,喺facebook睇到,人人都喺度鬧囍歡里。我諗,係咪惡搞咋?知道真係之後,我就好憤怒。
我參與整場保育利東街嘅運動,當時係灣仔區議會主席,睇住市建局點樣摧毀本土文化同埋囍帖行業,到𠵱家起咗豪宅同商場後,佢竟然玩呢啲食字遊戲,叫囍歡里,個名好庸俗,唔單止反映市建局係冇文化,亦都係污衊本土文化。點解唔叫番利東街呢?咁係反映市建局冇文化,唔重視社區,睇事太庸俗。

記:有人指這名字只是市建局、發展商推銷新商場的噱頭,何必深究?
琦:我覺得佢冇理由抹煞段歷史,利東街嘅歷史係屬於社區,唔係屬於政府,唔係畀市建局為所欲為。因為利東街係一個歷史傳承,唔係填海填出嚟,喺過去100年都係叫做利東街,係市建局人為地摧毀呢條街。
1920年嘅香港地圖,灣仔已有皇后大道東、莊士敦道、軒尼斯道,亦都有幾條橫街,廈門街、汕頭街、大王東街、大王西街、利東街。灣仔街道名字,係灣仔歷史一部份。市建局嚟拆嘢,我哋已經好憤怒,你拆咗之後,雪上加霜,喺傷口上灑鹽,連個名都抹煞埋。

當年有舊商戶死守利東街,由抗議、四處掛橫額、絕食、提出重建新方案、到官員寓所外示威,但抗爭最終敵不過市建局,舊商戶葉美蓉(May姐)批評,地產商想藉利東街賺大錢,把街名改為囍歡里,對舊店東、住客嚟講係諷刺至極。

記:囍歡里這個名字,對當日被市建局逼走的街坊、商舖店東,是否好大傷害?
琦:喺facebook有人話,不如叫「做瓜里」、「拆散里」啦,市建局明明就係拆散咗個社區。當年20幾間囍帖舖,有成三分之二係冇營業或各散東西,搬去土瓜灣、隔籬街、大陸,有啲結業。
香港囍帖行業係全球最旺盛,香港設計大紅帖係全球最叻,當年我訪問過店主,佢哋話有人喺溫哥華住,娶新抱、嫁女時,如果想印大紅帖,就寫個email返番嚟畀利東街店舖,特登請佢哋印。利東街囍帖舖好多生意都係嚟自多倫多、溫哥華、澳洲等全球華人,一條街仔睇嚟好似好巴閉,其實真係幾巴閉。

記:你認為日後項目落成後,昔日商舖可以在新項目經營嗎?
琦:要視乎幾錢租,因為以前個舖頭係自己嘅,唔使交租,新項目如果100蚊一呎租,咁點做呢?如果低租金或免租兩年,舊舖仲可以考慮,但我唔樂觀。因為市建局係商業為主,你睇吓市建局翻新嘅和昌大押,入面間西餐廳有幾昂貴就知啦。

記:明年落成的利東街重建項目,你可以想像是甚麼模樣?
琦:咪就係一個商場咁樣囉,同任何商場唔會有分別,可能呢個商場有間舖仔賣吓利是封、印吓帖囉,做一個最表面化、最膚淺嘅交代。當日佢哋收購係兩邊商舖一齊收,我就知道利東街係永遠消失。

記:街道或者街道名,對一個城市有多重要?
琦:九龍區好多街名係好靚,好似大角嘴,叫橡樹街,槐樹街,又一村有紫藤路,個名好靚。大角嘴仲有條叫做詩歌舞街,英文叫做Sycamore,個名幾靚呀,證明以前英國啲官有文膽,睇個街名就知政府係有文化。
但係你睇吓東涌、將軍澳,街道嘅名係好奇怪,好似細路仔改名咁,全部都係要好意頭。新區嘅城市規劃,係好冷感,冇人情味,都係一個又一個地盤,然後由天橋貫穿,南昌邨旁邊嘅街叫乜嘢名都唔會記得,令到條街都冇意思,其實係好慘。一個社區,唔係只係講方便出入。

張震遠下台後,由蘇慶和接任市建局主席,表明不會因為1%、2%的人而拖慢重建,表明會加快重建速度。

記:你對市建局新主席蘇慶和有期望嗎?
琦:我聽到蘇慶和話要加快收購重建速度,我真係好驚,舊區文化值得我哋重視,但呢幾年市建局起嘅新樓,幾乎全部都係畀有錢人嚟買樓收租,根本唔係幫冇能力買樓嘅人士上車,亦都幫唔到居民改善生活。

mailto:pf_lee@appledaily.com

《蘋果動新聞》新版App已經推出,居家遊行上街上網都咁方便,快啲更新,全民動起來!
立即下載↓↓
【iPhone版】 http://bit.ly/appledailyiPhoneapp
【Android版】 http://bit.ly/appledailyandroidapp

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載