› 選擇地區
三藩市
紐約
洛杉磯
其他美國地區
香港 台灣 北美
 
2013年06月28日

畢業生抗議梁振英 
黃秋生為學弟妹感驕傲

黃秋生讚揚學弟學妹勇於表達意見。

【本報訊】演藝學院畢業生抗議特首,獲校友及文化界力撐。榮譽院士兼校友黃秋生讚揚學弟學妹勇於表達意見,「呢啲(學生)將來做特首㗎。」教職員舒琪認為學生屢向特首示威,顯示民怨瀕臨爆煲。有指學生不尊重典禮,文化界不以為然,「搵個咁嘅特首主禮,都係唔尊重學生喎」。

相關新聞:訪大專屢遇示威

「一年就搞到咁都幾大鑊」

「幾好吖,後生仔唔做呢啲嘢,唔通幾十歲先做呀?」黃秋生坦言為學弟妹感到驕傲,笑指批評者多是年紀較大,「係老鬼嚟啦,冇幾何(參與典禮),就死喇。」他說年輕人應該勇於表達意見,「中國人講究剛毅木訥,只係要求好似一碌木咁。」
至於有學生疑舉中指,他說是個人修養問題,「但又唔係乜(大問題),好多rocker都咁。」
梁振英上任一年,社會怨氣甚大,黃秋生說:「一年就搞到咁,都幾大鑊。」他又認為特首只聽命中央,像斯諾登事件,「佢(特首)係一個副導演,執行導演都唔係,拍劇改對白要打電話同老闆申請,自己冇權㗎」。
「呢個係學生嘅畢業典禮,佢哋有自由咁做。」演藝學院電影電視學院院長舒琪說,事前不知悉學生行動,但不會阻礙學生。他說近年學生屢向特首示威,顯示社會已有問題:「我都唔係好滿意政府整體表現。」他說7.1會遊行。
「學校搵個咁嘅特首主禮,都係唔尊重學生喎。」新晉導演盧鎮業稱,「當年我哋畢業都想做,但最後都冇做到,好佩服佢哋。」他早前獲藝發局頒發電影新秀獎,上台後讓出得獎發言時間予碼頭工人阿四宣讀工人理念。
盧鎮業指演藝文化界對政府的不滿並非朝夕,政府缺乏持續文化政策,令藝術家難以發揮,藝術家申請資助更是難於登天。
於傑青頒獎典禮向特首送上說謊長鼻木偶的好戲量主席賴恩慈,讚揚學生有藝術家的風骨,不懼強權。她認為尊重是雙方的,若市民訴求不獲重視,盲目尊重強權,只是恐懼、獻媚。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載