› 選擇地區
三藩市
紐約
洛杉磯
其他美國地區
香港 台灣 北美
 
2013年06月04日

隔牆有耳:
琼子匿屋企 驚見燭光 - 李八方

六四向來都係建制派嘅禁地,尤其上咗位嘅紅人,更加唔肯或者冇膽面對1989年嘅良心。好似盛傳係N年後嘅女特首、民建聯副主席李慧琼咁吖,佢話以前曾經去過維園晚會㗎,之不過今晚呢,唔單止唔入維園,連燭光都唔會點起,總之開完會就會一如以往趕返屋企,仲辯稱唔參與晚會唔等於忘記六四;乜啲語調,咁似狼振英嘅?

學狼英玩語言偽術

六四前夕,建制派個個潛水,有「琼子」外號嘅李慧琼依舊大膽接受民主黨劉慧卿嘅網台節目訪問,都算有吉士。查實節目原本主要講行政立法關係,但卿姐喺節目結束前忽然「突襲」,話琼子同佢一樣着到灰灰黑黑,唔知係咪要悼念六四,仲食住上問佢今晚會唔會去維園,被殺個措手不及嘅琼子尷尷尬尬話:「六四嗰晚,我一般會盡力完成會議後返屋企。」
咁查實,佢以前有冇去過六四晚會呢?琼子話有喎,但重申每個人選擇處理同回憶六四嘅方式都唔同,仲學晒狼英嘅語言偽術反駁話:「冇參與唔等於我忘記,亦唔等於我冇記住呢件事發生。」
卿姐發揮記者本色繼續追問:唔去維園啫,咁會唔會喺屋企點支洋燭悼念一下?琼子斬釘截鐵話「冇呢個打算」。至於係咪支持平反六四?琼子冇正面回應,只係肯講一句,中央喺六四事件上有做錯,相信歷史會還一個公道喎。八方在此都想回敬一句:民建聯對六四嘅態度,歷史都會自有公論。

mailto:pf_lee@appledaily.com

要瞭解更多六四人和事,為死難者留下悼念的燭光,
請即登入蘋果【六四專頁】: http://6471.appledaily.com/

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載