› 選擇地區
三藩市
紐約
洛杉磯
其他美國地區
香港 台灣 北美
 
2013年05月23日

專題:揭花美港男真面目

認為男人化妝就是「娘娘腔」,可能只因你不夠潮而已。
受到一股韓國美男子妖風吹襲,脂粉撲向一眾港男面上,化妝逐漸變成部份港男的習慣,「好似走火入魔咁,即使約人遲到都要化,唔化妝唔敢落街」,從事市場推廣的Steve睜眼說。
「現時報讀化妝班嘅男生佔20%,無論係男售貨員、企業總裁或總理,都希望以化妝改善精神自信,取得更高信任」,資深化妝師Kenneth指,男士化妝只為面部修飾,若化妝後沒人察覺便算是成功的「男人妝」。 記者:羅鈺歡 攝影:劉脗文、胡智堅

黃子華曾經在棟篤笑中說過「化妝後仲認得你嗰啲叫化妝,認唔出嗰啲叫喬裝」,這天訪問化妝男Steve,他即場向記者示範卸妝及上妝過程,前後只需15分鐘,化妝後看不出「粉飾」過的痕迹,但明顯更精神,而面上一些暗瘡印也消失了。
「𠵱家好似走火入魔咁,接受唔到自己唔化妝出街,明知遲到,都要化咗妝先出門口」,已有三年化妝經驗的他,每日大約花半小時化妝、卸妝及護膚。他說以前自己和一般香港麻甩佬無分別,「刷牙洗面就落街」,目前卻要提早起身,雖然辛苦,但每日樣子「醒神」一點也算值得。
Steve今年23歲,是一名「直男」,任職市場推廣員,在一次工作中認識了化妝學校的導師,才知自己「樣衰」,「當時個老師就話我好似個稻草人咁,身型瘦、皮膚差、暗瘡多,嗰時先知道人哋睇出我咁多問題」。

上化妝課 月花逾千變靚啲

被人狂彈後奮發做人,為了工作時樣子更精神,他嘗試自己畫眼線,結果又出事,「嗰次係我第一次用化妝品,以為畫粗啲對眼會醒神啲,點知係人見到都狂笑,仲同我講『男人畫眼線要向內畫㗎!』,我嗰時先知男人化妝都有學問,所以決定報讀男士化妝課程,真真正正學化妝」。
學成後,他承認在工作上帶來相當多好處,「化妝後的確自信咗,講嘢都大聲啲,仲多咗好多女性朋友」。被人讚靚後,就無法回頭,開始每日都要化。「其實我好厚妝你唔知啫!」為求靚樣,他月花600元及700元買護膚品及化妝品,也覺得物有所值。
男人化妝除了美化外表,原來連心態也起了很大變化,Steve說懂化妝也等於擁有一面照妖鏡,可看清街上那些才是真正靚女。「未學化妝前覺得通街都係靚女,但學識後發覺原來好少,因為一眼就睇穿佢哋濃妝艷抹背後嘅真面目,真正靚女好少」。看穿港女真面目後,他卻沒有因此「揀飲擇食」要求極品,反而不求樣靚,只求人品。「揀女朋友,都係內涵最重要」,當真是曾經滄海難為水,除卻巫山不是雲。
不過他認為女人化妝還是很重要,但要以淡妝為主,「男人總係話唔鍾意女朋友化妝,其實口不對心,有次朋友帶埋女朋友出街,但個女仔冇化妝,個男朋友竟然話『你咁嘅樣我點帶你去玩呀!』」,所以不論男女,其實大家都喜歡看靚樣。
以前化妝品少有男士專櫃,直到近年韓國劇集、電影及音樂等旋風式襲港,美男妝開始成為少男的模仿對象,加上韓國將BB cream及sleeping mask等產品發揚光大,技術遠超外國,韓式妝容成為八十、九十後的追捧熱潮。
「個人化妝課程近三至四年因韓風變得大眾化,現時收生比例大約每15名學生中,就有三名係男生」,資深化妝師Kenneth透露,不少男性售貨員、教師、企業總裁及總理等需要見人,都會化妝示人,這是一個有禮貌的表現,「行出嚟都唔精神,點會有說服力呢?」他說男士化妝已變成不少人日常生活的一部份。

心理學家:化妝男缺自信 上司唔like

臨床心理學家葉妙妍(圖)卻有另一番解釋,她認為男性化妝可能是自信不足而至,她提醒大家不要過分依靠外表來提升自信,「好多時年輕人出外工作,上一輩嘅傳統男上司未必接受現代男性化妝,可能會誤解你嘅工作態度,亦都唔好浪費太多時間去化妝,或經常作為話題,會忽略咗正常嘅溝通技巧同別人嘅內在美」,她說太沉迷偏離現實,被社會排斥的機會更高。

你想爆?幫你爆!
熱線電話:2990 7225
mailto:Bom@sharpdaily.com.hk
WhatsApp:9131 4511

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載