› 選擇地區
三藩市
紐約
洛杉磯
其他美國地區
香港 台灣 北美
 
2013年05月18日

隔牆對論:
房策專家李永達:調整啱啱開始

李永達稱樓價仍然高企,不應為新稅設立日落條款。李忠浩攝

【隔牆對論】
記:《蘋果》記者
李:李永達,前立法會議員,前房委會委員,現為智庫土地監察主席記:你如何看現時的樓市?
李:近一、兩個月交易數量跌咗三、四成,個價跌咗5%,好多人話好驚,但係記住,由2009年個價升到𠵱家,呢四年差唔多升左成100%,咁𠵱家先至跌番5%,話樓市冰封,係言過其實。
調整係有需要,呢個調整亦未完,啱啱先開始。房屋係商品市場,冇一種商品會永遠會向上,金價過往幾年升到好勁,上個月咪跌咗成15%、20%,股市都係咁,樓市個周期都一樣有循環。現時個價仲係好高,係好多人負擔唔到的水平,2014、15、16年樓價調下嘅機會好高,我有朋友最悲觀係睇跌三、四成,一般都話要跌一、兩成。
記:政府由2010年起,推出額外印花稅、買家印花稅、雙重印花稅,樓價一直升到近月才停止,稅項只是令到成交量低,有出錯招嗎?
李:曾蔭權同梁振英政府,其實對個樓市都冇乜嘢好計仔,因為供應量先係解決問題嘅方式,但係做得好慢,所以惟有用稅。但呢啲招數都係用來買時間,因為若樓價升得再勁啲,民憤會好勁。
曾蔭權係歷史罪人,佢上任時,好少做土地開發,每年累積少五、六千個單位,六、七年咪少咗了五、六萬個單位供應。曾蔭權太過照顧地產商的利益,唔夠果斷。09年立法會動議辯論,跨黨派都支持贊成起居屋,但佢就係唔起。
記:地產界要求為這些新稅設立日落條款,到某時間要抽走,現時是抽走或修訂稅項的時機?
李:𠵱家跌咗5%,但新界樓都係賣緊7,000、8,000蚊一呎,市區仲係一萬蚊一呎,我認為,𠵱家唔係一個適當時間抽走呢啲稅項。如果明年聯儲局加息,個市跌多10%,屆時政府如果認為餘下辣招仲可以應付,咁抽走一個稅項都得。
記:現時10個經紀爭一張單,經紀也要過活,有否想過辣招影響他們的生計?
李:我同情佢哋嘅處境,但我哋每一個人都知道,當你入邊一行,係有不同嘅職場處境,例如公務員,可以穩定,每年升一個point,但唔會發達,除非你貪污。如果你投身私人市場,係可以賺好多錢,但公司低潮時會炒你。
地產代理本身唔係一份好穩定工作,要有心理準備,佣金時多時少,要有工作上嘅安排。當嗰年樓宇好多買賣,你一年賺嘅錢,可以係別人兩、三年搵嘅錢,但你有一年好似沙士嘅時候,你賺嘅係人哋半年嘅人工,冇人同你計到條數。

相關新聞:隔牆有耳:政府壓抑樓市措施

記:政府已表明會復建居屋、買樓的稅又加了,政府還可做甚麼去解決房屋問題?
李:要向市民提供一個服務承諾,話畀市民知,究竟等幾耐,一定可以有居屋、有公屋。地產佬話綠悠雅苑冇人要,但係最終所有限額都係用晒。我已經同政府講過,低價租畀私人會所嘅土地實在太大幅,應該叫佢哋畀三分之一出嚟起居屋、公屋,顯示畀公眾睇,政府係有決心解決問題。
記:關注了房屋問題十多年,你會如何形容當下的樓市?
李:𠵱家香港樓價差唔多可以話係我過去三十年最瘋狂嘅時間。我唔係講基層市民或者係一般中產買唔到樓,而係中、高層嘅中產都買唔到樓,即使買到都係好細間,我相信呢個唔係其他世界嘅中產所嚮往嘅生活,所以中產點會唔嬲政府呢?
記:如果現在要你置業,你買到樓嗎?會否鼓勵別人入市?
李:一定買唔到!我𠵱家嘅單位,我太太陳樹英2004年叫我買𠵱家呢個1,000呎單位,嗰時有錢買,但如果即使畀我做番立法會議員,每月人工八萬蚊,叫我買番我住嘅呢層樓,我都買唔番,買到都係好抆水。
入市嘅話,我覺得要好審慎,你嘅職業要好穩定,買來自住,但如果用來投資,就真係要三思,冇人預計2014、2015年發生乜嘢事,冇人知道下跌嘅周期幾時完結,上一個下跌周期由97年去到04、05,足足七、八年。如果𠵱家入市,祝你好運。

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載