› 選擇地區
三藩市
紐約
洛杉磯
其他美國地區
香港 台灣 北美
 
2013年05月10日

隔牆有耳:禿鷹嗜用牛刀殺雞
重案組變濫查組 - 李八方

從前一聽到「重案組」出動,都會覺得案件極端嚴重,唔係謀財害命,就一定係姦淫擄掠。不過,自從禿鷹接手管警隊之後,香港治安日趨太平,近年「威脅」香港治安嘅大案,往往喺一啲遊行示威「政治案件」,重案組都開始轉型,由「習近平××」塗鴉案,到點樣證明遊行集會係非法集結,全部都交由重案組跟進。就等八方同大家做一輯「重案組奇案大搜查」。

相關新聞:隔牆有耳:垃圾袋扑頭 女長毛「襲警」

示威案要就時間落口供

前日,警方拘捕佔中義工陳玉峰,話佢「協助組織未經批准的集結」、「參與未經批准集結」,呢單大案,係由「港島區重案組1A隊」主理,抽絲剝繭查足22個月,終於將最後一位疑人「低調」緝捕歸案。
今個星期,城大班「城管」空群而出抬走向狼英示威嘅學生,其間有「城管」聲稱被推跌,有人話係「城管」插水,世紀大茶飯,警方本住服務為本精神,列作「襲擊案」,派出深水埗警區重案組一隊全方位大偵查。
馬鞍山上月三度出現「習近平××」塗鴉,呢件係國家大事,沙田警區重案組當仁不讓,派出幹探守株待兔,終於捉到個犯,如果下次有「梁國雄××」塗鴉,警察要用同樣規格先好呀。
八方請教過資深大Sir,話要出動重案組,不外乎資源調配。例如「習近平××」塗鴉案,係因為疑犯連環犯案,所以要交畀重案組。呀,咁點解噚日喺大埔嘅連環高空擲物案,又只係由特遣隊負責呢?又原來示威案,一般有好多人要落口供,由於刑事調查隊一般返一日、放一日,好難夾到時間落口供,所以咪由重案接手囉。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載