› 選擇地區
三藩市
紐約
洛杉磯
其他美國地區
香港 台灣 北美
 
2013年04月29日

隔牆有耳:嘆午飯 拉頭馬 
大劉 羅傑承 審訊前各自精采 - 李八方

華人置業主席劉鑾雄(大劉)同南華足球隊足主羅傑承,涉嫌賄賂澳門運輸工務司前司長歐文龍案今日續審。雖然佢兩位官司纏身,但噚日繼續各自各精采,飯照食、馬照跑,八方見佢哋容光煥發,唔知係咪有好兆頭呢?

大劉行得快 睇落精神好

一向鍾情福臨門嘅大劉,噚日晏晝1點現身福臨門。而喺佢出現之前,已經有10人保鑣團列陣護主,大劉嘅媽媽同細妹劉玉珍率先抵達,女友呂麗君隨後陪佢坐房車抵達。有記者問佢會唔會去澳門應訊,佢不發一言箭步走入酒家,睇嚟身體狀況幾好,隨後佢細佬劉鑾鴻同富商何柱國亦相繼抵達。呢餐飯,大劉足足嘆咗兩個鐘。
羅傑承開審前亦好happy,噚日晏晝4點幾同太太梁芷珊以及朋友入咗沙田馬場,事關佢隻馬「軍事出擊」出戰國際一級賽愛彼女皇盃,最終爆出11倍冷門捧盃,贏咗798萬獎金。今次已經係呢隻馬喺季內第四捷,事關之前已贏過一月盃、香港金盃同精英碟,今次贏嘅女皇盃則係國際一級賽。
今年「軍事出擊」四度喺分級賽封王,季尾大有機會歷史性榮膺馬王,或者有機會為羅傑承帶嚟喺香港養馬嘅最高成就。而羅傑承三隻各以「軍事」命名嘅馬(軍事出擊、軍事機密、軍事行動),今季已經贏咗近千七萬獎金,可謂鴻運當頭,難怪兩夫婦喜孜孜去拉頭馬,頒獎嘅諷刺地係終審法院首席法官馬道立。
八方唔知呢場勝仗,會唔會為羅傑承洗走衰氣,噚日問佢開庭前緊唔緊張,佢微笑不語,但梁芷珊就直認覺得「幸運」,似乎相信會為此帶嚟好運咁喎,不過佢冇答會唔會陪同羅傑承出庭。

http://pf_lee @appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載