› 選擇地區
三藩市
紐約
洛杉磯
其他美國地區
香港 台灣 北美
 
2013年04月22日

隔牆有耳:
小李怕俾人做世界 飛髮到會 - 李八方

和黃大班霍建寧前日大鬧李卓人「幫工人做世界」,結果俾阿人以一句「我唔係張子強」秒殺!查實首富家庭都真係好驚人做佢世界㗎,好似最近俾人稱作「小李」嘅李澤鉅咁,八方曾聽聞一個關於「小李」剪髮嘅傳聞,呢個傳聞足以反映佢對外人好有戒心。八方有個朋友,識得一位隱世髮型師,喺好多年前曾經幫過港燈職員開興趣班教剪頭髮。其中一位學員係一位闊太,但髮型師最初並唔知道闊太嘅身份,更加唔知佢老公係邊位。

老婆王儷橋曾學剪髮

學剪髮期間,闊太有一日突然同髮型師講,佢老公趕住出差,可唔可以去佢屋企幫佢剪髮?髮型師原本唔係好願意,覺得想剪髮點解唔落舖頭幫襯,咁大牌要人上門?但最後都係心軟應承咗,就吓人哋一次咁多。
結果闊太搵靚車去接髮型師,車程都幾遠吓㗎,由炮台山嘅髮型屋直入南區。上車之後,髮型師根本唔知自己其實會去邊、要幫邊位剪髮。
直至入咗人哋大屋,見到大廳放咗首富張大油畫相,髮型師諗一諗先知道自己應該係要幫小李剪髮,個闊太就係佢老婆王儷橋!聽聞呢次經驗麻麻哋,隱世髮型師後來都唔想再「到會」剪髮。
講呢件事畀八方知嘅老友話,聽聞王儷橋當年學剪髮,其中一個原因,就係想幫老公理髮。老友認為事件反映小李份人好缺乏安全感,剪髮呢啲咁「高危」嘅活動,小李唔輕易交託畀人,點知會唔會俾人「做世界」㗎!

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載