蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年04月17日
馬上成為壹會員

隔牆有耳:
Kay歌暗撐佔中 - 李八方

「讓愛與和平佔領中環」行動雖然最快出年先成事,但網上噚日已經熱傳,佔中已經有主題曲嘞。邊個主唱?咪就係謝安琪Kay囉。有網友話,Kay首新歌《最好的時刻》,歌詞句句同公民抗命血肉相連,例如叫大家「燃燒一生能量 做伸張公義的酵母」,其實係暗地撐佔中,多謝阿Kay以歌聲佔領中環喎。

首歌歌詞劈頭第一句就係「置身於廣場上 在鏗鏘演說中宣佈」,已經帶畀人無限聯想;其後又話「對抗壓迫那一仗 有你迎着上」,「越是迫壓 圍牆再高 抬頭更驕傲」,更加令網民聽到好肉緊,覺得置身佔中現場,熱血沸騰呀!
其實呢首歌係由一向關心時事,反過狼英又反國教嘅樂壇長毛周博賢填詞,難怪令人覺得佢係想憑歌寄意推佔中。
據知周博賢創作靈感,嚟自馬丁路德金50年前「我有一個夢」演說,歌名都係取自狄更斯寫法國大革命嘅小說《雙城記》中嘅名句。八方噚日搵到周博賢回應,佢話首歌雖然唔係針對佔中,但歡迎外界各自表述,主要係勉勵港人面對困境要有信心。

宣揚「愛與和平」訊息

Kay經理人夏森美都話,有留意網民將首歌演繹為佔中歌曲,但佢強調首歌係想講面對唔公平時要爭取,帶有「愛與和平」訊息,絕對唔係宣揚抗爭,希望外界唔好咁多標籤喎。
但若然有人要將呢首歌當成佔中主題曲,佢都冇符。問到謝安琪撐唔撐佔中?佢話咁極端嘅社會環境中,唔方便表態喎。不過首歌都好清楚啦,呢句八方講嘅。咁啱得咁蹺,阿Kay日前原來去咗廣州獻唱呢首歌,唔知會唔會為一啲廣州人,帶嚟一啲啟示呢?

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載